15 mart 2013 14:37
AFFA-nın fəaliyyəti qənaətbəxş hesab olunub
Bu gün Azərbaycan Futbol Federasiyaları Assosiasiyasının (AFFA) növbəti Konfransı keçirilib. Azerisport.az xəbər verir ki, AFFA-nın inzibati binasında keçirilən Konfransı assosiasiya prezidenti Rövnəq Abdullayev açaraq nümayəndələri, qonaqları və mətbuat nümayəndələrini salamlayıb.
Hesabat dövrü ərzində ölkə futbolunun inkşiafı məqsədilə AFFA tərəfindən həyata keçirilmiş tədbirlər barədə qısa məlumat verən R.Abdullayev görülən işlərin müsbət nəticələr verdiyini bildirib. AFFA prezidenti FIFA U-17 qadınlararası dünya çempionatı Azərbaycan 2012-ni xatırladaraq deyib ki, bu, nəinki ölkəmizdə, ümumilikdə regionda keçirilən ən uzunmüddətli idman tədbiri olub və təşkilati işlərin yüksək səviyyədə olduğu FIFA rəhbərliyi tərəfindən xüsusi vurğulanıb. Sonra söz AFFA-nın baş katibi Elxan Məmmədova verilib. Baş katib Azərbaycanda keçirilmiş dünya çempionatı ilə bağlı FIFA tərəfindən hazırlanmış və beynəlxalq futbol qurumunun üzvü olan bütün milli assosiasiyalara göndərilmiş videoçarxın izlənməsini təklif edib. Videoçarxın nümayişindən sonra mandat komissiyasının sədri Gülağa Cabarov məruzə edərək 35 nümayəndənin hər birinin Konfransda iştirak etdiyini və Konfransın səlahiyyətli olduğunu bildirib.
Elxan Məmmədov çıxış edərək Azərbaycan futbolunun inkişafı ilə bağlı AFFA tərəfindən müəyyənləşdirilmiş prioritet istiqamətlər - infrastruktur, kütləvilik, təhsil - və bu yöndə həyata keçirilmiş tədbirlər barədə ətraflı məlumat verib. Baş katib qeyd edib ki, hesabat dövrü ərzində AFFA-nın fəaliyyəti haqqında videoçarx hazırlanıb. Hesabat xarakterli videoçarxın nümayişindən sonra Elxan Məmmədov qeyd edib ki, hər bir Konfrans iştirakçısının qovluğunda AFFA tərəfindən hazırlanmış hesabat jurnalı, eyni zamanda videoxülasənin DVD-si var. Sonra söz AFFA-nın baş mühasibi Xalid Cavadova verilib. Baş mühasib 2012-ci ilin maliyyə hesabatını, həmçinin 2013-cü il üçün büdcə layihəsini təqdim edib (maliyyə hesabatı və büdcə layihəsi saytımızda yerləşdiriləcək). Ardınca müstəqil audit təşkilatının nümayəndəsi Babək Məmmədovun hesabatı dinlənilib.
Hesabatlar təqdim olunduqdan sonra Konfrans nümayəndələri yekdilliklə AFFA-nın hesabat dövrü ərzindəki fəaliyyətinin qənaətbəxş olması barədə qərar qəbul ediblər.
Konfrans başa çatdıqdan sonra AFFA-nın prezidenti Rövnəq Abdullayevin mətbuat konfransı keçirilib.
