17 mart 2013 00:26
Georgi Nikolov: Özlərinin ən düzgün qərarlarından birini qəbul etdilər
“İnter”in prezidenti Georgi Nikolov AFFA İcraiyyə komitəsinin Azərbaycan Premyer Liqasının formatının dəyişdirilməsinə dair qərarına fikrini bildirib. Azerisport.az xəbər verir ki, Nikolov altılıqdan imtina və çempionatın 10 klubla dörd dövrədən ibarət sistemlə keçirilməsini dəstəkləyib.
“AFFA və PFL-in 2013-14-cü illər mövsümündə Premyer Liqanın formatını dəyişmək qərarı bir daha sübut edir ki, kainat ali şüur tərəfindən yaradılıb və idarə olunur.
Futbol müdrikləri özlərinin ən düzgün qərarlarından birini qəbul etdilər. Çünki dörd mövsüm Azərbaycan futbol klubları heç kimə gərək olmayan altılıqlarla zülm çəkirdilər. Bizim hamımızı rəşadət və səbrimizə görə mükafatlandırmaq vaxtı yetişmişdi. Yeri gəlmişkən, xeyir və şər qardaşdı: bizi məhv etməyən hər şey, bizləri daha güclü edir. Altılıqlarda yaşamaq uğrunda mübarizədə qalib gəlmiş klublar ağıllanaraq, daha çox təcrübə qazanaraq yeni mərhələyə qədəm qoyacaqlar.
Futbolun özü isə inkişaf edir, kamilləşir, tamaşaçılara yeniliklər bəxş edir. Bu, hər 3-4 il ərzində yeni, gözlənilməz, məntiqi təkliflər üçün yaxşı haldı. Beləcə hamını təngə gətirmiş altılıqlar yerini yeni formata təslim etməlidi.
Bu da özünün mənfi və müsbət cəhətləri ilə gəlir və əmin olun ki, tənqid və məzəmmətlər elə ilk gündən bu yeniliyin başında çatlayacaq. Ancaq ən əsası üstünlük - idman mübarizəsi prinsipinin son tura qədər saxlanılması olacaq. Cədvəldəki hətta onuncu klub liderə çempionluq mübarizəsində badalaq gələ biləcək. Texnologiyasına görə indiki altılıqlar buna imkan vermirdi.
Necə deyərlər, gələcəyimiz varsa, görəcəyimiz də var. Tamamilə mümkündü ki, bu kömbə də küt getsin. Bu halda növbəti il alnımızı divara çırpacağıq.
Ancaq indi hər şey işıqlı gələcək intizarında olan müəyyən vəcd halındadı. Yaxın gələcək...” deyə, Nikolov klub saytındakı bloqunda yazıb.
