23 mart 2013 02:06
Berti Foqts: Bütövlükdə yaxşı oynadıq
Futbol üzrə Azərbaycan yığmasının baş məşqçisi Berti Foqts DÇ-2014-ün seçmə mərhələsi çərçivəsində Lüksemburqla baş tutan oyundan sonra fikirlərini açıqlayıb. Azerisport.az xəbər verir ki, almaniyalı mütəxəssis qolsuz heç-heçə ilə bağlı öncə bunları dilə gətirib:
“Hər iki komanda maraqlı oyun sərgilədi. Bütövlükdə, biz yaxşı oynadıq. Çox təəssüf ki, qələbə qazana bilmədik”.
Almaniyalı mütəxəssis yetirmələrindən tam razı qalmadığını da etiraf edib: “Mən gözləyirdim ki, komandam daha aqressiv futbol sərgiləyəcək, daha çox mübarizə aparacaq. Əgər gözlədiyim kimi döyüşsəydik, qələbə qazana bilərdik. Bu matç da göstərdi ki, Azərbaycan yığmasının yaxşı futbolçuları var. Sadəcə, onlar başa düşməlidilər ki, belə oyunlarda qələbə qazanmaq üçün maksimim güc sərf etmək lazımdı”.
“Bu oyunda yeganə razı qaldığım məqam komandanın qol buraxmamasıdı. Çünki rəqibin də şansları var idi. Onlar da lazım olan qolu vura bilərdilər. Lüksemburq bu gün müdafiədə kompakt oyun sərgilədi. Bunun da nəticəsində biz istədiyimiz qədər qol epizodu yarada bilmədik”, deyə yığmamızın baş məşqçisi qeyd edib.
Foqts Elvin Məmmədova şans vermədiyi halda, Cavid Hüseynovu meydana buraxmasını belə izah edib: “Şimali İrlandiya ilə oyunda o, daha yaxşı təsir bağışlamışdı. Həm də “Bakı”nın son oyununda Cavid start heyətdə yer aldığı halda, Elvin meydana sonradan çıxdı”.
Millimizin çalışdırıcısı komandasının fiziki hazırlığından da şikayətlənib: “İkinci hissədə fiziki hazırlıq baxımından çatdırmadığımız hiss olunurdu. Lüksemburqu məğlub etdiyimiz iki il əvvəlki oyunla bu görüşü müqayisə etmək istəmirəm. Bunlar tamamilə fərqli oyunlardı”.
