26 mart 2013 12:35
AFFA – 21!
Bu gün Azərbaycan Futbol Federasiyaları Assosiasiyasının (AFFA) yaradılmasının 21-ci ili tamam olur. Azerisport.az xəbər verir ki, AFFA 1992-ci il martın 26-da yaradılıb.
Bu təşkilat Azərbaycanda futbolun idarə edilməsini həyata keçirir. Qurumun əsas məqsədi futbolun inkişafına və ölkədə populyarlaşmasına nail olmaqdı.
AFFA 1994-cü ildə FİFA və UEFA-ya üzv seçilib. Bununla da təşkilat klublarımızla yığmalarımızın beynəlxalq miqyaslı oyunlarda çıxış etmələrinə imkan yaranıb.
AFFA-nın ilk prezidenti Fuad Musayev quruma 1992-2003-cü illərdə rəhbərlik edib. Həmin dövrdə Azərbaycan futbolu müəyyən böhran keçirib, klublarla təşkilat arasında gərginlik yaşanıb. Klubların 2012-ci ilin aprelində 11-ci milli çempionatı dayandırmaları ilə pikə çatan gərginlik FİFA və UEFA-nın 2 illik sanksiyası ilə bitib.
2003-cü ildə ölkənin rəsmi qurumlarının və beynəlxlaq futbol təşkilatlarının iştirakı ilə imzalanmış Sürix müqaviləsi ilə AFFA-nın yeni Nizamnamə layihəsi hazırlanıb.
2003-cü il dekabrın 29-da AFFA-nın növbəti VI hesabat-seçki konfransı keçirilib, yeni Nizamnaməyə əsasən, AFFA-nın yeni prezidenti Ramiz Mirzəyev seçilib. Lakin Mirzəyev 2007-ci ildə vəfat edib. AFFA İcraiyyə Komitəsinin dekabrın 4-də keçirdiyi iclasın qərarına əsasən, prezident səlahiyyətlərinin icrası vitse-prezident Elşad Nəsirova həvalə olunub.
AFFA-nın 14 mart 2008-ci ildə keçirilmiş növbədənkənar konfransında Rövnəq Abdullayev qurumun prezidenti seçilib. O, ötən il, martın 9-da keçirilən növbəti hesabat-seçki Konfransında yenidən daha 4 illiyə prezident seçilib.
AFFA-da əsas qərarlar İcraiyyə Komitəsində (İK) qəbul olunur. AFFA prezidentinin sədrlik etdiyi İK-nın daha 10 üzvü var: Bunlar vitse-prezidentlər – Rauf Əliyevlə Elşad Nəsirov, veteran futbolçularımız Ələkbər Məmmədov, Kazbek Tuayev, İsgəndər Cavadov, Sahə Futbol Federasiyalarının prezidenti Mahir Məmmədov, Gənclər və İdman Nazirliyinin şöbə müdiri Mirkamil Rəhimov, təhsil nazirinin sabiq müavini Elmar Qasımov, “Bakı”nın prezidenti Hafiz Məmmədov və “İnter”in fəxri prezidenti Cahangir Hacıyevdi. AFFA-da qurumun icraçı idarəçiliyi ilə baş katib məşğuldur. Hazırkı baş katib Elxan Məmmədovdu.
