28 mart 2013 00:07
Rasim Ramaldanov: Klub prezidentindən üzr istədim, məni bağışladı
Son günlər idman mətbuatında ən çox müzakirə olunan mövzulardan biri Rasim Ramaldanovun “Simurq”un əsas heyətindən uzaqlaşdırılması idi. Azerisport.az xəbər verir ki, bu hadisə haqda hərə bir cür xəbər yazırdı. Lakin komandanın kapitanı klubun rəsmi saytına müsahibə verərək, baş verənlərə şəxsən ayınlıq gətirib və klub prezidenti ilə son görüşü haqda sualları cavablandırıb.
- Rasim, öncə “Kəpəz”lə oyunun fasiləsində nə baş verdiyinə aydınlıq gətirərdin...
- Gəncə təmsilçisi ilə oyun bizim üçün çox gərgin keçdi. Çünki istədiyimiz oyunu sərgiləyə bilmirdik və bu bizdə əsəbi durum yaratmışdı. Təbii ki, hesabda geri düşməyimiz rəhbərliyin də ürəyincə olmamışdı. Fasilədə klub prezidenti paltardəyişmə otağına daxil oldu. Komandanın oyunundan çox narazı idi və bu səbəbdən kapitan olaraq məni danladı. Həmin anda mən də hisslərimi cilovlaya bilmədim və buna reaksiya verdim. Bu da təbii ki, rəhbərliyin xoşuna gəlmədi və məni cəzalandırdılar.
- Mətbuatda isə sənin danışdıqlarından fərqli xəbərlər yazılırdı. Bu haqda nə deyə bilərsən?
- Bəli, düz qeyd edirsiz. Bu səbəbdən də mən bu məsələ haqqında danışmaq istərmirdim. Kim hardan nə eşidirdisə, üstünə əlavələrini də qoyub yazırdı. Guya ki, mən klub prezidentinə əl qaldırmışam. Bu cür yazanlara demək istərdim ki, birincisi Rasim elə tərbiyə sahibi deyil ki, klub prezidenti ilə əlbəyaxa olsun. İkincisi də, Anar müəllim klub rəhbəri olaraq, komandada hər bir futbolçu ilə gözəl münasibətlərə malikdi, o cümlədən də mənimlə. İstənilən şəxs qarşılaşdığı problemi açıq şəkildə prezidentə söyləyə bilir və o, bacardığı qədər köməklik edir. Ona görə bir daha bildirirəm ki, bu hadisə haqqında yazılan informasiyaların əksəriyyəti yalandan ibarət idi. Hər şey necə olmuşdusa, bildirdim.
- Bu gün klubun rəhbərliyi ilə yenidən bir araya gəldin. Son olaraq sənin haqqında nə qərara gəlindi?
- Mən bundan öncə də Anar müəllimlə görüşmüşdüm. Sonuncu dəfə Zaqatalada “Qarabağ”la oyundan sonra söhbət etmişdik. Bu gün yenidən onun qəbuluna getdim və söhbət etdik. Görüş zamanı bildirdim ki, həmin zaman nəticəyə görə məndə əsəbi olmuşam və iradlarınıza belə reaksiya vermişəm. Buna görə də Anar müəlimdən üzr istədim. O da hər şeyi anlayışla qarşıladı və mənim yenidən komandanın düşərgəsinə qoşulmağıma razılıq verdi. “Simurq” mehriban bir ailədi. Elə bir ailə yoxdu ki, orda nə vaxtsa söz-söhbət olmasın. Bizdə də bu cür oldu. Oturub hər şeyi müzakirə etdik və ortaq məxrəcə gəldik. Əsas odu ki, indi hər şey artıq qaydasındadı. Sabah (bu gün – azerisport.az) Zaqatalaya yola düşürəm və komandanın məşqlərinə qoşulacam. Bizi qarşıda ağır və çətin oyunlar gözləyir. Bu görüşlərdə mütləq yaxşı nəticələr qazanıb, məqsədimizə çatmalıyıq.
- Qarşıda “Bakı” ilə çətin sınaq var. Bu qarşılaşmada “Simurq”un şanslarını necə dəyərləndirirsən?
- Həm cəzalı, həm də yığmanın düşərgəsində olduğumdan komandanın son məşqlərində iştirak edə bilmirdim. Ancaq hər gün onlardan xəbər alırdım. Bildiyimə görə çox yüksək əhval-ruhiyyədə hazırlıqları davam etdirirlər. Premyer Liqada yaranmış fasilədən istifadə edərək Gürcüstanda qısa müddətli təlim-məşq toplanışı keçdilər və burada “Dila” kimi güclü komandanı minimal hesabla məğlub etdilər. İnanıram ki, “Simurq” “Bakı” ilə dueldən qalib ayrılan tərəf olacaq.
- Milli komandanın son iki oyunu haqqında nə deyərdin?
- Fikrimcə hər iki görüşdə pis çıxış etmədik. Luksemburq o qədər də zəif komanda deyil. Üstəlik doğma meydan amili köməklərinə çatdı. Bizdə ələ düşən qol vəziyyətlərindən yararlana bilmədik və nəticədə səfərdən qolsuz heç-heçə ilə qayıtdıq. Portuqaliya ilə görüşdə isə ilk hissədə yaxşı oyun nümayiş etdirdik. Ancaq ikinci hissədə hakimin qərəzli qərarından sonra meydanda bir nəfər az qaldıq. Bu da komandanın oyununa təsir göstərdi. Təbii ki, 10 nəfərlə Portuqaliya kimi güclü rəqibə qarşı mübarizə aparmaq çox çətindi. (klub saytı)
