28 mart 2013 18:48
Abdullayevin törətdiyi yol qəzası ilə bağlı detallara aydınlıq gətirildi
Xəbər verdiyimiz kimi, "Neftçi"nin yarımmüdafiəçisi Araz Abdullayev bu gün günorta saatlarında yol qəzası törədib. Azerisport.az xəbər verir ki, yol qəzası nəticəsində bir nəfər ölüb, bir nəfər xəsarət alaraq xəstəxanaya yerləşdirilib.
Bakının Nobel prospektində hadisə yarımmüdafiəçi "Neftçi"nin bazasına gedərkən baş verib. Daxili İşlər Nazirliyinin mətbuat xidmətindən bildiriblər ki, bu gün Araz Abdullayev idarə etdiyi "Nissan" markalı avtomobillə iki nəfəri vurub. Nəticədə onlardan biri hadisə yerində ölüb, digəri xəsarət alıb. Abdullayev yaralını dərhal avtomobilinə qoyaraq xəstəxanaya çatdırıb.
"Neftçi" Peşəkar Futbol Klubunun mətbuat xidmətinin rəhbəri Gündüz Abbaszadə bildirib ki, hadisənin baş verdiyi ərazidə təhlükəsizlik kameraları olduğundan hazırda yol qəzasının səbəbləri həmin kameraların köməyi ilə dəqiqləşdiriləcək. Mətbuat xidmətinin rəhbəri, eyni zamanda, bu məsələnin bəzi media orqanlarında süni şəkildə şişirdilməsini düzgün hesab etmədiyini və heç kimin belə bir hadisədən sığortalanmadığını deyib.
Hadisə şahidlərinin bildirdiyinə görə, yol qəzasının baş verməsinin əsas səbəbkarı Araz Abdullayev olmayıb. Belə ki, hadisə baş verən zaman başqa sürücünün idarə etdiyi "Porsche Panamera" markalı avtomobil yolun kənarında 2 süpürgəçini vuraraq Araz Abdullayevin idarə etdiyi avtomobilin qabağına tullayıb. (Trend)
