28 mart 2013 16:08
Ramiz Məmmədov: Qarabağı məğlub etməyə yetəcək gücümüz var
“Qəbələ”nin baş məşqçisi Ramiz Məmmədov Topaz Premyer Liqasının 24-cü turunun “Qarabağ”la oyunu öncəsi fikirlərini açıqlayıb. Azerisport.az saytına müsahibəsində Qəbələ klubunun çalışdırıcısı bunları dilə gətirib:
“Fasilə dövründən yaxşı yararlanmağa çalışdıq, hazırlaşırdıq. Bəzi futbolçularımız müxtəlif yığmalara çağırılmışdı. Kubokda mübarizəni dayandırandan sonra bütün fikrimiz Premyer Liqaya yönəlib. Çempionatda uğurlu çıxış etmək istəyirik. İddiamız qalır və son tura qədər mübarizəmizi davam etdirəcəyik. Bizi qarşıda “Qarabağ” kimi ciddi rəqiblə duel gözləyir. Amma biz də özümüzü zəif komanda saymırıq. Əksinə, bu komandanı məğlub etmək üçün yetərli gücümüz var”.
