29 mart 2013 17:47
AFFA qalmaqallı mətbuat konfransına münasibət bildirdi
Azərbaycan - Portuqaliya oyunundan əvvəl və sonra rəqib komandanın baş məşqçisi Paulo Bentunun iştirakı ilə keçirilən mətbuat konfransında ilkin sual - cavabların Azərbaycan dilinə tərcümə olunmaması yerli jurnalistlər arasında ciddi narazılıqla qarşılandı. Azerisport.az xəbər verir ki, buna etiraz əlaməti onların böyük əksəriyyəti mətbuat konfransını tərk etdi.
Bu məsələyə AFFA-nın münasibətini öyrənmək üçün baş katib Elxan Məmmədovla əlaqə saxladıq. Mətbuat konfransında yaşananları xoşagəlməz hal kimi dəyərləndirən baş katib fikrini belə izah etdi: "Rəsmi oyunlardan əvvəl və sonra keçirilən mətbuat konfranslarında deyilən bütün suallar və cavablar hər iki ölkəni təmsil edən jurnalistlərin başa düşdüyü dilə və ya yerli komandanın doğma dili ilə yanaşı ingilis dilinə tərcümə olunmalıdı. Təssüflər olsun ki, buna millimizin Portuqaliya yığması ilə oyun ərəfəsində rəqib komandanın media rəsmiləri tərəfindən əməl olunmayıb. Biz AFFA olaraq bunun yolverilməz olduğunu bildiririk. Çünki millimizin baş məşqçisinin keçirdiyi mətbuat konfransı Azərbaycan dili ilə yanaşı ingilis dilinə də tərcümə olundu. Rəqib isə mətbuat konfransının canlı yayımlanmasını bəhanə edərək bu qaydanı pozdu. Onu da əlavə etmək istərdim ki, bu olay FİFA və UEFA tərəfindən oyuna təyinat alan nümayəndələrin diqqətindən yayınmadı. Nəzərə almaq lazımdı ki, bütün rəsmi oyunlarda olduğu kimi bu qarşılaşmada da baş məşqçilərin və futbolçuların fikirlərinin operativ olaraq canlı yayımı üçün danışdığı dildə verilməsi məqsədilə "fləş-müsahibə" və "mix" zonaları yaradılmışdırdı və rəqib baş məşqçi canlı yayım üçün bundan istifadə edə bilərdi".
