30 mart 2013 13:14
Qəbələ Bavariya, Çelsi və Milana qarşı
“Qəbələ”nin 13 yaşa qədər futbolçulardan ibarət komandası bu gün səhər saatlarında IV Vodafone Beynəlxalq Futbol Turnirində iştirak məqsədilə Antalyaya yollanıb. Azerisport.az xəbər verir ki, artıq ənənə halını almış turnirdə bu “qırmızı-qaralar”ın 4-cü iştirakıdır. FİFA bayrağı altında keçirilən Vodafone kubokunda Avropanın tanınmış klubları – “Bavariya”, “Milan”, “Çelsi”, “Vilyarreal”, “Galatasaray”, “Fənərbaxça”, “Beşiktaş” birincilik uğrunda yarışacaqlar.
İlkin mərhələdə komandalar 4 kollektivdən ibarət qruplarda mübarizə aparacaqlar. Bu mərhələdə “Qəbələ” “H” qrupunda “Bursaspor”, “Kosova SDC – İFA” və “Kızılcahamamspor”la üz-üzə gələcək. Turnirin aşılış günündə - 31 martda təmsilçimiz iki matç keçirəcək. “Qəbələ” öncə “Bursaspor”, daha sonra isə “Kosova SDC – İFA” ilə münasibətlərinə aydınlıq gətirəcək. Aprelin 1-də isə “qırmızı-qaralar” qrup mərhələsinin son oyununda “Kızılcahamamspor”la qarşılaşacaq.
Xatırladaq ki, ilk dəfə 2010-cu ildə iştirak etdiyi turnirdə təmsilçimiz turnirin ən ümidverici komandası seçilmişdi. 2011-ci ildə isə "Qəbələ" turniri 7-ci sırada tamamlamışdı. Ötən il təmsilçimiz nəticəsini bir qədər də yaxşılaşdıraraq yarışı 5-ci pillədə yekunlaşdırmışdı.
