1 aprel 2013 01:19
Cihan Özkaranın baş məşqçisi istefa verdi, amma…
Millimizin üzvü Cihan Özkaranın çıxış etdiyi “Sivasspor”un baş məşqçisi Rza Çalımbay istefa verib. Azerisport.az xəbər verir ki, Super Liqanın 27-ci turu çərçivəsində “Orduspor”u qəbul edən Sivas klubu 3:2 hesablı qələbə qazanıb.
Buna baxmayaraq baş məşqçi istefa verib. Səbəb isə azarkeşlər olub. Belə ki, onlar oyunboyu Çalımbayı və futbolçu Hayrettinə hədəflənmiş şüarlar səsləndiriblər.
Oyundan sonra açıqlama verən baş məşqçi bunları deyib: “Gedirəm. İstər mən olum, istər Hayrettin olsun, Sivasın övladıyıq. Matç zamanı azarkeş oyunçusunu söyməz, baş məşqçisini istefaya çağırmaz. Oyun bitəndən sonra istədiyini etsin. Bütün bunlar məni məyus etdi, buna görə də getmək fikrinə düşmüşəm. Bura azarkeşlərin dəstəyi ilə gəlmədim, rəhbərlik sahib çıxdı. İndi söz onlarındı. Mən qərarı rəhbərliyin verməsini istəyirəm. Onları heç vaxt yarıyolda buraxmaram”.
“Sivasspor”un prezidenti Mecnun Otyakmaz isə matçdan dərhal sonra verdiyi açıqlamada istefa ilə bağlı bunları deyib: “Onun açıqlamasından xəbərim yoxdu. Bir azdan görüşüb, danışarıq. Belə bir şey mümkün deyil. Əminliklə deyirəm də, Rza hoca getsə, biz də gedərik”.
