2 aprel 2013 16:57
“Neftçi ilə oyunda qələbə bizim üçün daha vacibdi”
“Qarabağ” aprelin 6-da “Neftçi” ilə qarşılaşacaq. Azerisport.az xəbər verir ki, Ağdam klubu derbiyə hazırlıqlarını davam etdirir.
Azərbaycan derbisində Vaqif Cavadov və Branimir Subaşiçin oynamayacağı dəqiqdi. Amma “Qəbələ” ilə son görüşdə yeni transferlər - Torres, Reynaldo və Opara yaxşı təsir bağışlayaraq itkiləri hiss etdirmədilər. Sonuncu görüşdə “Qarabağ”da debüt edən Kristian Torres də 89 dəqiqə meydanda qalaraq diqqətləri cəlb etdi.
“Qarabağ”ın ilk argentinalısı klub saytına həm bu oyun, həm də “Neftçi” haqqında danışıb: “Bəxtsizlikdən “Qarabağ”a qoşulan kimi zədələndim. Hardasa 2 ay meydandan kənarda qaldım. Sağ olsunlar, komanda yoldaşlarım, məşqçilər daim mənə dəstək oldular. “Qəbələ” ilə vacib görüşdə start heyətində meydana çıxmağım bir qədər həyəcanverici olsa da, oyunun gedişində tezliklə bu problemi aradan qalxdı. Sevindirici haldı ki, qələbə qazana bildik. Uşaqlarla sona qədər mübarizə apararaq lazımı nəticəni qazana bildik. İndi bizi qarşıda “Neftçi” ilə oyun gözləyir. “Ağ-qaralar” olduqca yaxşı futbol oynayır. Amma bizim də hədəfimiz bəllidi. “Neftçi”ni udsaq, iddiamız çox güclənəcək. Qələbə “Neftçi”dən çox bizim üçün vacibdi. 3 xal fərqin 3-ə qədər azalması deməkdi. “Neftçi” ilə oyunda meydanda olmaq istərdim. Amma buna baş məşqçimiz qərar verir. Komandamızda hər mövqedə inanılmaz rəqabət var. Bu, şübhəsiz ki, komandamızın xeyrinədi. İnanırıq ki, sonda istədiyimiz nəticəni qazana bilərik. Bizim buna potensialımız çatır”.
