2 aprel 2013 17:45
Beşiktaş, Villareal və Rubin klubları Bakıya gəlir!
İyun ayında Bakı şəhərində İBAR CUP uşaq futbol turniri keçiriləcək. Azerisport.az “İnter”in klub saytına istinadən xəbər verir ki, ötən il bu turnir ilk dəfə baş tutmuş və Azərbaycan Beynəlxalq Bankının 20 illik yubileyinə həsr olunmuşdu.
Belə qərara alınmışdı ki, turnir mütəmadi xarakter alsın və bu il Avropanın müxtəlif ölkələrindən olan uşaq komandaları yenidən Bakıda toplaşacaq. İBAR U-14 CUP turniri AFFA-nın dəstəyilə baş tutacaq, yarışın təşkilatçıları Azərbaycan Beynəlxalq Bankı, “İnter” Peşəkar İdman Klubu və Bakı Futbol Federasiyası olacaq.
Turnirdə 8 komanda iştirak edəcək. Reqlamentə əsasən, komandalar 2 qrupa ayrılacaq və hər qrupda 4 komanda mübarizə aparacaq. Hər qrupdan ən yaxşı 2 komanda mükafat yerləri uğrunda mübarizəni davam etdirəcək, qrupda 3-cü və 4-cü yerləri tutan komandalar 5-8-ci yerlər uğrunda mübarizə aparacaq.
Qeyd edək ki, “İnter” U-14 komandasından başqa turnirə birinci İBAR CUP turnirinin qalibi "Rubin" (Rusiya), "Karpatı" (Ukrayna), “Beşiktaş” (Turkiyə), "Yurqorden" (İsveç), “Villarreal (İspaniya) və “Eintracht (Almaniya) komandaları qatılacaq. Sonuncu iştirakçının adı bu həftə məlum olacaq.
Əlavə edək ki, turnir iyun ayının 17-dən 22-dək keçiriləcək. İBAR CUP turnirinin bütün matçları “Şəfa” stadionunda baş tutacaq. Tezliklə turnirin püşkatma mərasimi keçiriləcək.
