4 aprel 2013 12:17
Ruslan Abışov Stemford Bricdə
Bu gün Rusiyanın “Rubin” klubu Avropa Liqasının 1/4 final mərhələsinin ilk oyunu çərçivəsində səfərdə İngiltərənin “Chelsea” klubunun qonağı olacaq. Azerisport.az xəbər verir ki, heyətində futbol üzrə Azərbaycan yığmasının müdafiəçisi Ruslan Abışovun da yer aldığı komandanın London təmsilçisi ilə görüşü Bakı vaxtı ilə 00:05-də start götürəcək.
Qeyd edək ki, Kazan klubunun heyətində bu oyuna Abışov da yollanıb. Böyük Britaniyaya viza məsələsi problem olsa da, Ruslanın bəxti bu baxımdan gətirib. Çünki o, yığmamızın Şimali İrlandiya ilə ötən ilin sonlarında baş tutan oyun öncəsi AFFA tərəfindən müvafiq viza ilə təmin edilmişdi. Həmin vizanın müddəti bitmədiyindən, Abışov problemsiz şəkildə komandasıyla birgə Londona yola düşüb. Lakin o, Avroliqa üçün komandasının iştirak ərizəsində yer almadığından, “Chelsea” ilə görüşdə iştirak edə bilməyəcək və “Stemford Bric”də “Rubin”ə sadəcə azarkeş kimi dəstək verəcək.
