5 aprel 2013 19:25
“Özümü millidə oynamağa hazır sayıram”
"Rəvan” bazar günü Topaz Premyer Liqasıın 25-ci turu çərçivəsində "Sumqayıt”la üz-üzə gələcək. Azerisport.az xəbər verir ki, komanda hazırlığı "Bayıl Arena”da davam etdirir.
Turnir cədvəli baxımından prinsipial oyundan öncə müdafiəçi Nodar Məmmədov klubun rəsmi saytına danışıb. O, sözlərinə "Sumqayıt”la matçın hazırlığının necə keçməsi ilə başlayıb: "Hazırlıq, şükür Allaha, yaxşı keçir. Hər gün məşq edirik. Qarşıdakı oyuna ciddi hazırlaşırıq. Hər şey qaydasındadır. Ümumiyyətlə, biz hər bir oyuna hərtərəfli hazırlaşırıq. "Sumqayıt”la matç da bu baxımdan istisna deyil. Turnir cədvəlindəki vəziyyətimiz bizi məhz 3 xala oynamağa məcbur edir. Bu rəqibdən uzaqlaşmaq üçün qələbə mütləqdir. Əlimizdən gələni edəcəyik ki, final fitindən sonra sevinən tərəf biz olaq”.
Məmmədov ötən həftə baş tutan və bir sıra məqamları ilə "Rəvan”ın tarixinə düşən "Turan”la oyun (6:2) barədə bunları söyləyib: "İlk qoldan sonra bir qədər rahatlaşma oldu, məncə. Ancaq Premyer Liqa matçlarında belə hala yol vermək olmaz. Çünki istənilən rəqib başağrısı ola bilər. Üstəlik, müdafiədə səhvlərə də yol verdik. Yaxşı ki fasilə zamanı baş məşqçi futbolçuları "ayılda” bildi. Məhz onun tənbeh, tənqid və tələblərindən sonra əla ikinci hissə keçirdik. Ümid edirəm ki, uğurlu oyunlar seriyasını bu həftə də davam etdirəcəyik”.
Sonda "4” nömrə yenidən Azərbaycan millisinə dəvət alacağına ümid etdiyini deyib: "Özümü yığmada oynamağa hazır sayıram. Daha öncə "Qarabağ”da oynayarkən yığmaya cəlb olunurdum. "Qəbələ”də isə məşqçilər mənə şans vermədi və belədə millidən uzaq düşməyim normal idi. İndi isə daim oynayıram və özümü milli üçün hazır sayıram. Ancaq hər şey baş məşqçidən asılıdır. Gərək onun dəvəti olsun əvvəlcə. İstənilən halda, xoş günlərin birində yenidən milli formanı geyəcəyimə dair ümidimi itirmirəm”.
