6 aprel 2013 14:57
“Bunun Azərbaycan futbolu üçün xeyirli olacağını düşünürəm”
Azərbaycanda istedadlı futbolçuları kəşf edib dünya futboluna qazandırmağı planlaşdıran Bakı “Galatasaray” Futbol Məktəbi artıq fəaliyyətə başlayıb. Azerisport.az Türkiyə mətbuatına istinadən xəbər verir ki, məktəb “Galatasaray”ın baş məşqçisi Fatih Terimin istəyi ilə açılıb.
Türkiyədən gələn məşqçilərlə yanaşı yerli mütəxəssisdər gənc istedadları tapıb üzə çıxarmağa çalışacaq. Məktəbə 6-16 yaşlı futbolçular cəlb olunacaq. Hər 3 aydan bir istedadlı oyunçular Türkiyəyə aparılacaq və “Galatasaray”ın Floryadakı bazasında məşq keçəcəklər. Fatih Terim və aşağı yaş qruplarının məşqçiləri tərəfindən bəyənilən azərbaycanlı futbolçular İstanbul klubunun formasını geyinmək imkanı qazanacaq.
“Galatasaray”ın aşağı yaş qruplarının rəhbəri, Qəbələ Futbol Akademiyasının sabiq rəhbəri Ali Yavaş məktəblə bağlı Türkiyə mətbuatına açıqlama verib: “Xarici ölkələrdə bir-bir məktəblərimizi açırıq. Burdakı oyunçuları ilk olaraq “Galatasaray” mədəniyyəti və tərbiyəsini aşılayaraq yetişdirmək istəyirik. Daha sonra isə onları “Galatasaray”a qazandırmağa çalışacağıq. Azərbaycanda çox istedadlı uşaqlar var. Burda son illərdə uşaq futboluna çox önəm verilir. Bunun Azərbaycan futbolçu üçün xeyirli olacağını düşünürəm”.
