11 aprel 2013 01:37
Barcelona və Bayern də 1/4 finalda! (YENİLƏNİB)
Futbol üzrə UEFA Çempionlar Liqasında 1/4 final mərhələsinin cavab oyunları keçirilib. Azerisport.az xəbər verir ki, ilk oyun günündə iki qarşılaşma baş tutub.
Dortmund “Borussia”sı öz meydanında “Malaga”nı qəbul edib. İlk qarşılaşma qolsuz başa çatdığı üçün, almanlara yalnız qələbə lazım idi. İspaniya təmsilçisi isə hətta qollu heç-heçə sayəsində də mərhələ adlaya bilərdi. Görüşün son saniyələrinə qədər İspaniya klubu hesabda öndə olsa da, "alman maşını" məhz əlavə vaxtda vurduğu ardıcıl iki qol sayəsində əzmkar qələbəyə sevinib və yarımfinala yüksəlib.
Günün digər oyununda isə qardaş Türkiyənin bu turnirdəki yeganə təmsilçisi “Galatasaray” doğma divarlar arasında Madrid “Real”ı ilə üz-üzə gəlib. İlk oyunda 0:3 hesabı ilə uuduzan “sarı-qırmızılar”ın mərhələ adlamaq şansı az olsa da, ÇL-dən ən azı qələbə ilə getmək imkanı var idi. Erkən qol buraxmasına baxmayaraq, Fatih Terimin yetirmələri üç ardıcıl qolla qələbə qazanmağı bacarıblar. Dubla imza atan Ronaldonun son saniyələrdəki qolu isə heç nəyi dəyişməyib. Beləcə, "Galatasaray" "Real"ı məğlub etsə də, mərhələ keçə bilməyib.
İkinci oyun günündə isə Parisdə qollu heç-heçəyə razılaşamış “Barcelona” evdə PSG ilə münasibətlərinə aydınlıq gətirib. Bu dəfə 1:1 hesabı qeydə alınıb. Lakin səfərdə daha çox qol vurması kataloniyalıları növbəti mərhələyə çıxarıb. “Juventus” isə səfərdə uduzduğu “Bayern”dən qisas almağa çalışıb. Amma Almaniya klubu səfərdə də eyni hesabla qalib gələrək, yarımfinala yüksəlib.
Çempionlar Liqası
1/4 final (cavab oyunları)
9 aprel
Borussia (Dortmund, Almaniya) – Malaga (İspaniya) - 3:2 (İlk oyun - 0:0)
Qollar: Levandovski, 40, Roys, 90, Auqusto, 90+1 - Xoakin, 25, Eliseu, 82.
Galatasaray (Türkiyə) – Real (İspaniya) - 3:2 (0:3)
Qollar: Ebue, 57, Sneyder, 71, Droqba, 72 - Ronaldo, 8; 90+3.
10 aprel
Barcelona (İspaniya) – PSG (Fransa) - 1:1 (2:2)
Qollar: Pedro, 71 - Pastore, 50.
Juventus (İtaliya) – Bayern (Almaniya) - 0:2 (0:2)
Qollar: Mandzukiç, 64, Pisarro, 90.
