11 aprel 2013 00:24
Nikolov: Düşünmürəm ki, Azərbaycan futbolunda legionerlərin olması pis haldı
“Hazırda komandamız turnir cədvəlində 2-ci yerdədi. Lakin bu o demək deyil ki, biz çempion ola bilmərik. Bizim yaxşı şansımız var. Ümumilikdə, komandanın çıxışından razıyam. Ötən tur “Bakı” ilə qarşılaşdıq və çox vacib qələbə qazandıq”. Azerisport.az xəbər verir ki, bu fikirləri “İnter”in prezidenti Georgi Nikolov deyib.
Klub radiosunun qonağı olan bolqar prezident “İnter”in ötən çempionluqlarını xatırlayıb: “Klubumuz iki dəfə ölkə çempionu olub və hər iki qələbə son turda qazanılıb. “Qarabağ”ın yarımmüdafiəçisinin (Zaur Həşimov-red.) “Olimpik”in qapısına vurduğu fantastik qolu hələ də xatırlayıram. Həmin qol sayəsində biz çempion olmuşduq. Bundan başqa, ikinci çempionluq da bizə son turda və çox gərgin mübarizə nəticəsində nəsib olmuşdu”.
Nikolov çempionatın formatının dəyişdirilməsi məsələsinə də toxunub: “Mən “altılığ”ın mənfi tərəfləri barədə tez-tez danışırdım və çox şadam ki, çempionatın belə formatda keçirilməsinə son qoyulacaq. Bir qədər təəssüf doğurur ki, Premyer Liqanı iki əyalət klubu tərk edəcək, ancaq ümumilikdə klubların sayının 10-adək azaldılmasından sonra çempionatda yalnız yaxşılar qalacaq”.
Klub rəhbəri legionerlər barədə verilən sualları cavablandırıb: “Düşünmürəm ki, Azərbaycan futbolunda legionerlərin olması pis haldı. Bir baxın, görün Brüs Abdulay necə çxış edir. Bəs Nikolas Kanales “Neftçi” üçün nə qədər qol vurub. “Rəvan”ın futbolçusu Mindauqas Kalonas isə çempionata əla uyğunlaşdı. Belə futbolçular çempionata əlavə çalar qatırlar, onlarla yanaşı oynayan yerli futbolçular da həmin futbolçulardan nəsə öyrənə bilərlər”.
