11 aprel 2013 01:46
Neftçi Apelyasiya şikayətinə bu gün baxılmasını tələb edir
Xəbər verdiyimiz kimi, “Neftçi” rəhbərliyi bu klub barədə İntizam Komitəsinin çıxardığı sərt qərarlarla bağlı Apelyasiya Komitəsinə şikayət ünvanlayıb. Azerisport.az xəbər verir ki, paytaxt təmsilçisi apelyasiya şikayətinə məhz bu gün baxılmasında da maraqlıdı.
Bu barədə “Neftçi”nin vitse-prezidenti Tahir Süleymanov məlumat verib. O, bunu belə əsaslandırıb: “Aprelin 12-də biz “Simurq”la oyun üçün Zaqatalaya yola düşürük. Bu, o deməkdi ki, iclas həmin gün baş tutsa, bizim rəsmilərimizdən heç biri bu toplantıya qatıla bilməyəcək. Biz eyni zamanda hər şeyə tam dəqiqliklə baxılması üçün bu toplantıya AFFA-nın baş katibi Elxan Məmmədovun, PFL prezidenti Ramin Musayevin, Hakimlər Komitəsinin sərdi Xaqani Məmmədovun, “Qarabağ”la oyunumuzun baş hakimi olmuş Rəhim Həsənovun da qatılmasını istəyirik. Bütün bu istəklərimizlə bağlı AFFA-ya müraciətimizi bildirmişik. Amma hələ də onlardan bu toplantının konkret nə vaxt baş tutacağına dair cavab məktubu almamışıq. Mümkündü ki, həmin iclas bu gün baş tutmasın”.
