11 aprel 2013 12:39
“Artıq Neftçini yox, İnteri düşünürük”
“Qarabağ” 2 gün sonra “İnter”lə qarşılaşacaq. Azerisport.az xəbər verir ki, Premyer Liqanın 26-cı turu çərçivəsində “bankirlər”lə qarşılaşacaq komanda hazırlıqlarını davam etdirir.
Bu gün komandanın bir məşqi nəzərdə tutulub. 2-ci pillədə qərarlaşmış rəqiblə oyun öncəsi “Qarabağ”ın sol cinah müdafiəçisi Ansi Aqolli klub saytına həm ötən tur “Neftçi” üzərindəki qələbədən, həm də hədəflərdən danışıb:
“Hazırda bütün diqqətimizi “İnter”lə oyuna yönəltmişik. “Neftçi” ilə oyunu unutmuşuq. Bizim “Neftçi”ni ardıcıl 3 oyunda məğlub etməyimiz onların liderlik kürsüsündə əyləşməsinə mane olmayıb. İndi bizə vacib olan “İnter” üzərində uğurlu nəticə qazanmaqdı. “İnter”i cari mövsümdə uda bilməmişik. Üstəlik, rəqib sabit futbol sərgiləyir və bizimlə eyni hədəflər uğrunda mübarizə aparır. “İnter”in ən böyük üstünlüyü bəlli sistemlərinin olmasıdı. Kimin oynaması onlarda elə də fərq etmir. Amma biz də görüşə qələbə üçün çıxacağıq. Ev oyunumuzda qələbə qazanmaq istəyirik. Hazırda “Qarabağ” yaxşı formadadı. Komandamızda zədəlilərin də düzəlməsi vəziyyətimizə müsbət təsir edib. Demək olar ki, hər mövqedə ciddi rəqabət var. Bu da ümumilikdə komandanın artırmasına kömək edir. Hər bir oyuna xüsusi motivasiya ilə hazırlaşırıq. Bu, o deməkdi ki, bütün oyunlara 3 xal üçün çıxırıq. “İnter” nə qədər güclü olsa da, hədəfimiz yenə eynidi. Futbolun gözəlliyi istənilən nəticəyə açıq olmasıdı. İnanıram ki, “İnter”lə görüş baxımlı olmaqla yanaşı istəyimizə uyğun başa çatacaq”.
