12 aprel 2013 12:52
“Bakı - Atletico matçı tarixi bir oyun olacaq”
Azerisport.az sizi “Bakı”nın vitse-kapitanı Aleksandar Şoliçin rəsmi saytına müsahibəsi ilə tanış edir.
- Son vaxtlar “Bakı” öz oyununu tapmaqdadı. Hal-hazırda komandada vəziyyət necədir?
- Mövsüm ərzində komandada xeyli dəyişiklik oldu. Ona görə də bəzi çətinliklər yaşadıq. Futbolçuların bir-birinə öyrəşməsi prossesi bitib. Ona görə də oyundan-oyuna daha yaxşı performans göstəririk. Məşqlərimiz maraqlı keçir. Əhval-ruhiyyəmiz qaydasındadır.
- Bəziləri sizi ilk “altılıq”da da görmürdü...
- Onlar bir az tələsmişdilər. Bu, bizim üçün faciə olardı. Nə yaxşı ki, biz bu vəzifənin öhdəsindən gəldik. Amma bu da son deyil. Bizim nəinki çempionatda, həm də ölkə kubokunda irəliləmək şansımız qalır. İki yoldan biri ilə Avropa kuboklarına vəsiqə qazanmalıyıq.
- Ayın axırı “Bakı” ilə “Atletiko” arasında beynəlxalq yoldaşlıq görüşü keçiriləcək. Bu oyunla bağlı nə deyə bilərsiniz?
- Mən “Bakı” ilə “Atletiko”nun əməkdaşlığa başladığı üçün çox sevindim. Belə bir klubdan nəinki “Bakı”, hətta Azərbaycan futbolu çox şey öyrənə, qazana bilər. Oyuna gəldikdə isə mən “Atletiko”ya qarşı oynamağı özümə şərəf bilirəm. Bu, tarixi bir oyun olacaq. Bu günlərdə klubun heyətində olduğum üçün çox şanslıyam. Əlbəttə, biz bu oyunda hər hansı nəticə barədə düşünməyəcəyik. Klub kimi onlardan öyrənə biləcəyimiz bir çox şeylər olacaq. Təcrübə toplayacağıq.
- “Bakı”nın heyətində 131 oyun keçirmisiniz. Keçirdiyiniz oyunların sayına görə klubun tarixində üçüncüsünüz. Rekordunuzun sirri nədədi?
- Mən hər zaman demişəm, yenə də deyirəm ki, öz oyunumu bu klubda tapmışam. Əgər klubun tarixində ən çox oyun keçirən legionerəmsə deməli bunu öz oyunumla haqq etmişəm. Əslində mənim üçün ən önəmlisi komandamın qələbə qazanmasıdır. Şəxsi rekordlar mənim üçün ikinci plandadır. İnanıram ki, mövsümün sonunda ikinci, növbəti mövsümdə isə ən çox oyun keçirən oyunçu olacağam.
