17 aprel 2013 00:24
Azərbaycan kubokunda yarımfinal həyacanı
Bu gün futbol üzrə Azərbaycan kubokunda yarımfinal mərhələsinin ilk oyunları keçiriləcək. Azerisport.az xəbər verir ki, iki qarşılaşmadan ibarət olan mərhələ oyunlarındakı hər 2 cüt əvvəllər dəfələrlə bu yarışda üz-üzə gəlib.
“Neftçi” ilə “Qarabağ” ümumiyyətlə ölkə kuboku tarixində ən çox qarşılaşan komandalardı. 9-cu dəfə kubokda yolları kəsişən rəqiblərin duellərində 5 dəfə “Qarabağ”, 3 dəfə “Neftçi” mərhələ adlayıb. Bunların birində bakılılar yarışda mübarizəni davam etdirməkdən imtina etdiyi üçün “Qarabağ” mərhələnin qalibi sayılıb. İndiyədək yalnız bir dəfə onların dueli indiki kimi yarımfinala təsadüf edib. 7 il əvvəl mərhələni 1 qolla keçən ağdamlılar sonda kuboka yiyələniblər.
Maraq üçün qeyd edək ki, bu komandalar cari mövsüm Premyer Liqada da çox iddialıdılar. “Neftçi” liderdi. “Qarabağ” isə paytaxt klubunun 3 xal gerisində, ikinci yerdə qərarlaşıb. Bu üzdən komandalardan hansısa kuboku və ya Premyer Liqanı digərinə qurban verə bilər. Hər halda ilk oyunun nəticəsi bu baxımdan daha böyük önəm kəsb edəcək.
Kubokun digər yarımfinal cütündə isə “Bakı” “Xəzər Lənkəran”la qarşılaşacaq. Kubokda 5-ci dəfə bir-birinə rəqib olan komandaların hərəsi 2 dəfə cütün qalibi olub. 2 il əvvəl də yarımfinalda baş tutan qarşılaşmaların qalibi “Xəzər Lənkəran” olmuşdu. Həmin vaxt cənublular mərhələni səfər qolu ilə keçmişdi. Bu dəfə necə olacağı maraqla gözlənilir.
Bu dəfə ilk oyunun Bakıda keçirilməsi cənub təmsilçisinin xeyrinə olan amillərdəndi. Hər halda səfərdə sərfəli nəticə qazanmağı bacarsa, “ağ-yaşıllar”ın doğma meydanda azarkeşlərinin də dəstəyi sayəsində finala çıxması problem olmayacaq. Amma bu, heç də asan başa gəlməyəcək. Çünki son dövrlər yüksəlişdə olan Bojidar Bandoviçin komandası bütün ümidlərini ölkə kubokuna bağlayıb. Adətən kubokda daha uğurlu çıxış edən “zolaqlılar” ilk altılıqda mübarizə aparsa da, Premyer Liqadan avrokuboklara vəsiqə qazanması mümkünsüzdü. Ona görə də paytaxt klubu məhz kubokda uğur qazanmaqla Avropaya yollanmaq istəyir.
Elə cənub klubu da bütün diqqətini kuboka yönəldib. Bu mövsüm ilk altılığa da düşə bilməyən cənub təmsilçisinin yeganə çıxış yolu kuboku qazanmaqdı. Əks halda “Xəzər Lənkəran” bu mövsümü də tam boşa vermiş olacaq.
Yeri gəlmişkən qeyd edək ki, son 3 ildə kuboku qazanan komandaların (2009/10 və 2011/12 mövsümlərində “Bakı”, 2010/11-də “Xəzər Lənkəran”) qarşılaşması “Xəzər Lənkəran”ın baş məşqçisi Con Toşakın Azərbaycan kubokunda debütü ilə əlamətdar olacaq. Komandanı 3 çempionat matçına çıxaran uelsli mütəxəssis 2 il əvvəl yarımfinalda “Bakı”nı udmaqla qazanılan kuboku yenidən Lənkərana gətirmək üçün daha 1 addımın atılmasına çalışacaq. Toşak kubokda uğur qazanmağı bacarsa, bu, həm də ona növbəti mövsüm öncəsi inamı artırmış olacaq. Axı cənub klubu onu məhz gələn mövsüm yubileyə çempionluq bəxş etməsi üçün gətirib.
Onu da bildirək ki, bu gün keçiriləcək görüş klubların ümumilikdə 32-ci qarşılaşması kimi tarixə düşəcək. 9 ildi davam edən rəqabətdə qələbə sayında paytaxt futbolçuları üstündü. Onlar 11, cənublular isə 8 dəfə meydanı qalib kimi tərk edib. Digər 12 görüşdə qalib müəyyənləşməyib. Ümumi top fərqində isə 31 qol vuran XL 29 dəfə qapısında qol görüb. Əvvəlki matçlardan 24-ü çempionat, 7-si kubok çərçivəsində olub. Kubokda paytaxt təmsilçisi 4, XL 2 qələbəyə sevinib və 1 dəfə “sülh”lə ayrılıblar. Kubok oyunlarındakı top fərqində bakılılar öndədir – 8:7. Lakin bu 7 matçı özündə birləşdirən 4 dueldə hər komanda 2 dəfə qalib olub. 2006/07 və 2008/09 mövsümlərində duellər ¼ finala təsadüf edib. Əvvəl “Xəzər Lənkəran” (2:0 və 0:1) 2 il sonra isə bakılılar (0:1, 2:2) mərhələ adlayıb. 2009/10 mövsümündə finalda 1:2 hesabı ilə uduzan XL növbəti il rəqibini dayandıra bilib. Həmin – 2 il əvvəlki duel indiki kimi yarımfinala təsadüf edib. Onda XL səfər qolu ilə (1:0 və 1:2) mərhələ adlayaraq sonda 3-cü dəfə kubokun sahibi olub.
Azərbaycan Kuboku
Yarımfinal (ilk oyunlar)
17 aprel
16:00. Bakı – Xəzər Lənkəran
AFFA nümayəndəsi: Vaqif Davudov.
Hakim-inspektor: Murad Məmmədov.
“Bakı” FK-nın təlim-məşq bazasının stadionu.
19:30. Neftçi – Qarabağ
AFFA nümayəndəsi: Qürbət Həsənov.
Hakim-inspektor: Əli Hüseynov.
Bakı. “Baksell Arena”.
