17 aprel 2013 18:57
Seriyaya son qoymaq arzusu
"Rəvan” Topaz Premyer Liqasının 27-ci turunda səfərdə AZAL ilə qarşılaşacaq. Azerisport.az xəbər verir ki, aprelin 19-da "AZAL Arena”da keçiriləcək oyun ərəfəsində statistik məqamlara toxunmaq yerinə düşərdi. Görək rəqəmlər nə deyir?
Hazırda ikinci "altılıq”da ilk 2 pilləni tutan komandalar indiyə qədər öz aralarında 6 dəfə qarşılaşıb. Bu matçlarda “Rəvan” 4 dəfə qələbə qazanıbsa, cəmi 1 halda meydanı xalsız tərk edib. O da cari mövsümün AZAL ilə ilk səfər oyununa təsadüf edib. Deməli, “aslanlar” həm bu məğlubiyyətin əvəzini çıxmaq, həm də qələbə yürüşünü davam etdirmək imkanına malikdi. “Rəvan” evdə keçirdiyi bütün oyunlarda üstələdiyi AZAL ilə son 2 səfər matçında 3 xal qazana bilməyib. Başqa sözlə, “Rəvan” bunun seriya xarakteri almasını əngəlləməlidi. Yeri gəlmişkən, top fərqində də “Rəvan” bu rəqibindən öndədi – 10:6.
Onu da qeyd edək ki, ardıcıl 4 qələbə qazanmış “Rəvan” səfərdəki son 3 matçından 2-də meydanı 3 xalla tərk edib. 6 oyundu uduzmayan AZAL isə son 3 ev qarşılaşmasında qalib gəlib. Deməli, seriyalardan biri mütləq qırılacaq.
