18 aprel 2013 01:46
İtaliya Kuboku: Roma İnteri səfərdə də məğlub edib, finala çıxdı
Futbol üzrə İtaliya Kubokunda yarımfinal mərhələsinin son cavab oyunu keçirilib. Azerisport.az xəbər verir ki, yeganə oyun “İnter”lə “Roma” arasında baş tutub.
Qeyd edək ki, bu komandalar arasında keçirilmiş ilk oyunda “Roma” 2:1 hesablı qələbəyə sevinmişdi. Bu üzdən də “İnter” növbəti mərhələyə adlamaq üçün mütləq ev oyununda qalib gəlməliydi. Hesabı da məhz Milan klubu açıb. Lakin bundan sonra toparlanan paytaxt klubu üç ardıcıl qol vurmaqla demək olar ki, növbəti mərhələyə vəsiqənin taleyini tam həll edib. “İnter”in son dəqiqələrdə vurduğu növbəti qol isə sadəcə təsəlli xarakteri daşıyıb.
Beləcə, “Roma” İtaliya Kubokunun son finalçısı olub. Qeyd edək ki, ilk finalçı paytaxtın digər təmsilçisi “Lazio” olmuşdu. Bir sözlə, həlledici oyunda - əzəli rəqiblər derbi matçına çıxacaqlar.
İtaliya Kuboku
Yarımfinal (cavab oyunu)
17 aprel
Inter – Roma – 2:3 (ilk oyun – 1:2)
