24 aprel 2013 00:17
Final yolunda son sınaq
Bu gün futbol üzrə Azərbaycan kubokunda yarımfinal mərhələsinin cavab oyunları keçiriləcək. Azerisport.az xəbər verir ki, məhz bu qarşılaşmalardan sonra mayın 28-də keçiriləcək final matçının iştirakçıları bəlli olacaq.
İlk oyunda doğma meydanda əzmkar qələbə qazanmış (2:1) “Neftçi” səfərdə “Qarabağ”ın qonağı olacaq. Bu iki klub ümumiyyətlə ölkə kuboku tarixində ən çox qarşılaşan cütlükdü. 9-cu dəfə kubokda yolları kəsişən rəqiblərin duellərində 5 dəfə “Qarabağ”, 3 dəfə “Neftçi” mərhələ adlayıb. Bunların birində bakılılar yarışda mübarizəni davam etdirməkdən imtina etdiyi üçün “Qarabağ” mərhələnin qalibi sayılıb. İndiyədək yalnız bir dəfə onların dueli indiki kimi yarımfinala təsadüf edib. 7 il əvvəl mərhələni 1 qolla keçən ağdamlılar sonda kuboka yiyələniblər.
Maraq üçün qeyd edək ki, bu komandalar cari mövsüm Premyer Liqada da çox iddialıdılar. “Neftçi” liderdi. “Qarabağ” isə paytaxt klubunun 3 xal gerisində, ikinci yerdə qərarlaşıb. Bu üzdən komandalardan hansısa kuboku və ya Premyer Liqanı digərinə qurban verə bilər. Baxmayaraq ki, ilk oyunda tərəflər bunu heç də hiss etdirmədilər. “Neftçi” 2:1 hesablı üstünlüyünü qorumaq üçün hətta heç-heçəyə də qane olacaq. Ağdam klubu isə minimal hesablı qələbə sayəsində mərhələ keçə bilər. Baxmayaraq ki, bu cür prinsipial oyunun sadəcə bir qolla başa çatması inandırıcı görünmür. Xüsusilə ilk oyunda Anar Salmanovun ağdamlıların qapısına təyin etdiyi mübahisəli penalti qərarından sonra bu dəfə gərginlik daha üst həddə olacaq. Bunu elə həmin oyundan sonra bir sıra sərt açıqlamalarla yadda qalan Tahir Gözəlin dediklərindən də başa düşmək çətin deyildi.
Kubokun digər yarımfinal cütündə isə “Bakı” “Xəzər Lənkəran”la qarşılaşacaq. Kubokda 5-ci dəfə bir-birinə rəqib olan komandaların hərəsi 2 dəfə cütün qalibi olub. 2 il əvvəl də yarımfinalda baş tutan qarşılaşmaların qalibi “Xəzər Lənkəran” olmuşdu. Həmin vaxt cənublular mərhələni səfər qolu ilə keçmişdi. Bu dəfə necə olacağı maraqla gözlənilir. “Bakı” ilk oyunda minimal hesablı qələbəyə sevinmişdi. Təbii ki, Lənkəranda qeydə alınacaq istənilən hesablı heç-heçə “zolaqlılar”ı finala çıxaracaq. Bu üzdən də Con Toşakın komandası mütləq qələbə qazanmağa çalışacaq.
Cavab oyununun Lənkəranda keçirilməsi də cənub təmsilçisinin xeyrinə olan amillərdəndi. Hər halda “ağ-yaşıllar”ın doğma meydanda azarkeşlərinin də dəstəyi sayəsində finala çıxması mümkündü. Amma bu, heç də asan başa gəlməyəcək. Çünki son dövrlər yüksəlişdə olan Bojidar Bandoviçin komandası bütün ümidlərini ölkə kubokuna bağlayıb. Adətən kubokda daha uğurlu çıxış edən “zolaqlılar” ilk altılıqda mübarizə aparsa da, Premyer Liqadan avrokuboklara vəsiqə qazanması mümkünsüzdü. Ona görə də paytaxt klubu məhz kubokda uğur qazanmaqla Avropaya yollanmaq istəyir.
Elə cənub klubu da bütün diqqətini kuboka yönəldib. Bu mövsüm ilk altılığa da düşə bilməyən cənub təmsilçisinin yeganə çıxış yolu kuboku qazanmaqdı. Əks halda “Xəzər Lənkəran” bu mövsümü də tam boşa vermiş olacaq. Yeri gəlmişkən qeyd edək ki, Toşak kubokda uğur qazanmağı bacarsa, bu, həm də ona növbəti mövsüm öncəsi inamı artırmış olacaq. Axı cənub klubu onu məhz gələn mövsüm yubileyə çempionluq bəxş etməsi üçün gətirib.
Onu da bildirək ki, bu gün keçiriləcək görüş klubların ümumilikdə 33-cü qarşılaşması kimi tarixə düşəcək. 9 ildi davam edən rəqabətdə qələbə sayında paytaxt futbolçuları üstündü. Onlar 12, cənublular isə 8 dəfə meydanı qalib kimi tərk edib. Digər 12 görüşdə qalib müəyyənləşməyib. Ümumi top fərqində isə 31 qol vuran XL 30 dəfə qapısında qol görüb. Əvvəlki matçlardan 24-ü çempionat, 8-i kubok çərçivəsində olub. Kubokda paytaxt təmsilçisi 5, XL 2 qələbəyə sevinib və 1 dəfə “sülh”lə ayrılıblar. Kubok oyunlarındakı top fərqində bakılılar öndədir – 9:7. Lakin bu 8 matçı özündə birləşdirən 4 dueldə hər komanda 2 dəfə qalib olub. 2006/07 və 2008/09 mövsümlərində duellər ¼ finala təsadüf edib. Əvvəl “Xəzər Lənkəran” (2:0 və 0:1) 2 il sonra isə bakılılar (0:1, 2:2) mərhələ adlayıb. 2009/10 mövsümündə finalda 1:2 hesabı ilə uduzan XL növbəti il rəqibini dayandıra bilib. Həmin – 2 il əvvəlki duel indiki kimi yarımfinala təsadüf edib. Onda XL səfər qolu ilə (1:0 və 1:2) mərhələ adlayaraq sonda 3-cü dəfə kubokun sahibi olub.
Azərbaycan Kuboku
Yarımfinal (cavab oyunları)
24 aprel
19:00. Xəzər Lənkəran – Bakı
Lənkəran. Şəhər mərkəzi stadionu.
İlk oyun – 0:1
21:00. Qarabağ – Neftçi
Bakı. Tofiq Bəhramov adına Respublika stadionu.
İlk oyun – 1:2
