23 aprel 2013 15:25
Ticani yenidən Azərbaycan klubunda!
Vaxtilə Azərbaycanda çıxış etmiş nigeriyalı hücumçu Əhməd Ticani yenidən ölkəmizə qayıdıb. Azerisport.az xəbər verir ki, 25 yaşlı forvard karyerasını “Bakı”da davam etdirə bilər.
Qeyd edək ki, o, hazırda məhz paytaxt klubunun əvəzedici komandasına məşq edir. Yayda onun əsas komandaya keçməsi gözlənilir.
Maraq üçün xatırladaq ki, Ticani 2005-2007-ci illər aralığında Qusarın “Şahdağ” klubunda çıxış etmişdi. O, həmin dövrdə bu klubda 40-a yaxın oyun keçirmiş və 17 qol vurmuşdu. 2007-ci ildə isə Əhməd “Bakı”ya transfer olunmuşdu. Paytaxt klubunda 8 oyun keçirdikdən sonra AZAL-a keçidi gündəmə gələn nigeriyalı legioner bu transfer baş tutmayına vətəninə dönmək məcburiyyətində qalmışdı.
Ticani o dövrdə hətta yığma komandamıza da dəvət olunmuşdu. Amma atasının vəfatı ilə əlaqədar vətəninə gedən futbolçu Berti Foqtsun yaratdığı həmin şansdan yararlana bilməmişdi.
