26 aprel 2013 18:33
“Premyer Liqada heç bir klub sənə havayı 3 xal verməz”
Topaz Premyer Liqasında ikinci "altılığ”ın ilk dövrəsi çərçivəsində, 24-cü turda baş tutan "Turan” – "Rəvan” görüşündə paytaxt klubu rəqibini böyük hesabla üstələmişdi. Azerisport.az xəbər verir ki, həmin oyunda het-trik edərək görüşün əsas qəhrəmanlarından olan Xuan Manuel Varea həm də "Rəvan” tarixinə düşmüşdü.
Belə ki, o, Premyer Liqa çərçivəsində 1 oyunda rəqib qapısından 3 top keçirən ilk "aslan” olmuşdu. Tovuzlularla növbəti oyun ərəfəsində argentinalı bombardirimiz klubun rəsmi saytına danışıb.
Hazırda hesabında 13 qol olan və bombardirlər yarışında 3-cü pillədə qərarlaşan Xuan budəfəki oyunun daha çətin olacağını düçünür:
"Unutmaq lazım deyil ki, öncəki oyunda ilk hissədən sonra uduzurduq. Sadəcə, həmin matçda fasilədən sonra fantastik çıxış etdik. Premyer Liqada heç bir komanda sənə havayı 3 xal verməz. Hamı döyüşür. Özü də hazırda rəqibimizin durumu elədir ki, hər xal onlar üçün qənimətdir. Elitada qalmaq uğrunda yarışda həlledici mərhələ başlayır deyə, "Turan” bu dəfə daha inadkarcasına oynayacaq. Onlar "Xəzər Lənkəran”dan xal alıb, sonra da "Kəpəz”i udublar. Deməli, bizə qarşı da vuruşacaqlar. Amma "Rəvan”ın da öz məqsədləri var. Hələ elitadakı yerimizi tam qətiləşdirməmişik. Ona görə də 3 xal bizə də vacibdir. Ümumiyyətlə, hər matçda meydana 3 xal dalınca çıxırıq. Sadəcə, bəzən nəsə alınmır və heç nəsiz qalırsan. Çalışacağıq ki, bu dəfə belə istisna olmasın”.
