26 aprel 2013 15:42
Xəzər Lənkəran məşqləri bərpa edib, Bakıya yola düşdü
Azərbaycan kubokunun yarımfinal mərhələsində “Bakı” zəfəri ilə finala adlayan “Xəzər Lənkəran” dünən keçirilən bərpa məşqindən sonra bu gün, səhər saatlarında AZAL-la keçiriləcək matçın hazırlığına start verib. Azerisport.az xəbər verir ki, Lənkərandakı bazanın ehtiyat meydançasında baş tutan məşqdə futbolçular Con Bencamin Toşakın rəhbərliyi altında saat yarım ərzində məşq ediblər.
Hazırda komandanın heyətində müdafiəçi Vanderson Skarduellinin zədəsi məşqçilər korpusunu narahat edən yeganə məqamdı. “Bakı” ilə cavab qarşılaşmasında zədələnən müdafiəçiyə “sağ ayaq pəncəsinin qapalı sınığı” diaqnozu qoyulub. Digər itki isə hücumçu Dimitrios Sialmasla bağlıdı. 27-cı turda “Sumqayıt”la qarşılaşmanın son dəqiqələrində qırmızı vərəqə alan forvard AZAL-la qarşılaşmada komandasına kömək edə bilməyəcək.
Bu gün günorta saatlarında “Xəzər Lənkəran” doğma şəhərdəki hazırlığını başa çatdırıb Bakıya yola düşüb. Komanda axşam məskunlaşacağı oteldə istirahət edib sabah oyun öncəsi son məşqinə çıxacaq.
