28 aprel 2013 15:55
Con Toşak: Finala vəsiqəni alnımızın təri və azarkeşlərimizin gücü ilə qazandıq
Ölkə kubokunun yarımfinal matçı çərçivəsində paytaxtın “Bakı” klubunu iki oyunun nəticəsinə görə məğlub edib finala vəsiqə qazandıqdan iki gün sonra qarşı tərəf matçı idarə edən hakimlər briqadasının onların finala adlamasına mane olduğu haqqında fikirlərlə mətbuatda çıxış etdi. Azerisport.az xəbər verir ki, bu məsələyə “Xəzər Lənkəran” klubunun mətbuat xidməti rəsmi şəkildə münasibət bildirdikdən sonra baş məşqçi Con Bencamin Toşak da “Bakı” klubunun iddialarına rəsmi sayt vasitəsilə cavab verib.
Həmin açıqlamanı təqdim edirik:
“Mən “Bakı” tərəfinin bu açıqlamaları ilə tanış olub çox üzüldüm. Normal olaraq mən hakimlik haqqında heç zaman danışmıram. Amma əgər rəqibimiz hakimlərin bizə kömək etdiyini önə çəkirsə deyim ki, biz özümüz də hakimlikdən razı qalmadıq. Bircə şeyi vurğulayım ki, “Bakı” klubunun 5 nömrəli futbolçusu (Aqil Nəbiyev nəzərdə tutulur-red) iki dəfə simulyasiyaya əl atıb əlverişli hücumumuzun qarşısını aldı. Yan hakim bir dəfə real qol şansımıza mane olub oyundan kənar vəziyyət qeydə aldı. Mən, cavab qarşılaşmasından sonra mətbuat konfransında dediyim fikirlərimə bir daha qayıtmaq məcburiyyətindəyəm – “Bakı” mərhələ adlamağı hələ ilk oyunda uduzmuşdu. Biz finala vəsiqəni futbolçularımızın alnının təri və azarkeşlərimizin gücü ilə qazandıq”.
