29 aprel 2013 14:08
“Bu, gənc futbolçuları həvəsləndirir, sabaha ümidləndirir”
Topaz Premyer Liqasının 28-ci turu “Qəbələ” üçün bir sıra maraqlı məqamlarla yadda qaldı. Azerisport.az xəbər verir ki, “Qarabağ”la ev oyununda meydançaya 4 gənc futbolçu – Sadiq Quliyev, Kamal Mirzəyev, Tərzin Cahangirov və Ürfan Abbasovla çıxan “qırmızı-qaralar” komandanın gələcəyi və gənc futbolçuların inkişafı baxımından mühüm addım atdı.
Matç Sadiq Quliyev və Kamal Mirzəyevin debütü ilə yaddaqalan oldu. Oyundan sonra klub saytına açıqlama verən debutantlar hisslərini bölüşüblər.
Çıxışını dəyərləndirən 18 yaşlı Sadiq Quliyev meydançaya həyəcansız çıxdığını bildirdi: ”Maraqlı və gərgin oyun alındı. Mənim üçün xüsusilə yaddaqalan matç oldu. Məğlub olmağımız məyusluq yaradır. İstərdim ki ilk oyunumdan qələbə ilə ayrılım. Təəssüf ki, alınmadı. O ki, qaldı fərdi oyunuma fikrimcə, normal çıxış etdim. Amma bunu ən yaxşı məşqçi heyəti və izləyicilər dəyərləndirə bilər. Meydançaya həyəcansız çıxmışdım. İlk dəfə idi ki, “Qəbələ” bu sayda gənc futbolçu ilə çıxış edirdi. Bu addım həm əvəzedici heyətdəki, həm də akademiyada yetişməkdə olan futbolçuları həvəsləndirir, sabaha ümidləndirir. Çalışacam mənə bəslənən ümidləri doğruldum, oyunumla əsas komandada möhkəmlənim”.
Kamal Mirzəyev ona şans verilməsini gözlədiyini, bu addımın onları stimullaşdırdığını söylədi:
“Mənə şans verilməsini səbirsizliklə gözləyirdim. İlk dəqiqələrdə həyəcanlı idim, amma vaxt irəlilədikcə həyəcanı üstümdən ata bildim. Çıxışım barədə danışmağım düzgün olmazdı. Bu barədə məşqçilər danışsa daha düzgün olar. Amma fikrimcə gənclərin meydançadakı topla davranışları və anlaşmaları normal səviyyədə idi. Ən əsası bizlərə şans verilməsi gənc futbolçuları stimullaşdırır”.
