30 aprel 2013 12:09
Xəzər Lənkərandan Bakıya dəstək
“Xəzər Lənkəran” “Bakı” - ”Atletiko” (Madrid) əməkdaşlığını yüksək qiymətləndirir. Azerisport.az xəbər verir ki, Lənkəran təmsilçisi bu barədə rəsmi saytı vasitəsilə yaydığı açıqlamada məlumat verib.
Həmin açıqlama ilə sizi də tanış edirik: “Azərbaycan futbolunun inkişafına xidmət göstərmək yolunda daim özünəməxsus müsbət addımları ilə fərqlənən “Xəzər Lənkəran” futbol klubu olaraq “Bakı” klubunun da, Avropanın tanınmış bir klubu ilə əməkdaşlığını yüksək qiymətləndiririk. Bu gün heyətində Avropanın bir çox tanınmış futbol ulduzlarının toplaşdığı Madrid “Atletiko”sunun İspaniya La Liqasında formalarında “Azerbaijan – Land of Fire” reklamı ilə meydana çıxmasına necə sevinmişdiksə, bu gün də, bu klubun “Bakı”nın dəvəti əsasında paytaxtımızda olmasından məmnunluq duyuruq. “Xəzər Lənkəran” klubu olaraq düşünürük ki, klublarımızın ölkəmizi və futbolumuzu dünyada tanıtdırmaq yolunda atdığı hər bir belə addım ümumi olaraq ölkə futbolumuzun inkişafına xidmət sayılmalıdır. Hazırda klublarımızın ölkə daxilində klub infrastrukturunu formalaşdırmaq xətti ilə yanaşı hazırlayıb həyata keçirdikləri “Azerbaijan – Land of Fire” kimi böyük layihələrdə, Azərbaycan Respublikasının prezidenti cənab İlham Əliyevin “Azərbaycan futbolunun inkişafına dair dövlət proqramı”na dəstək verən gözəl bir addımdır.
Bir daha “Xəzər Lənkəran” klubu olaraq “Bakı” klubunun həyata keçirdiyi lahiyəni, “Bakı”- “Atletiko” (Madrid) əməkdaşlığını yüksək qiymətləndirib dost paytaxt klubuna bu yolda uğurlar arzulayırıq.
“Xəzər Lənkəran” Futbol Klubu”
