2 may 2013 21:54
Simurq hazırlıqları başa vurdu
Topaz Premyer Liqasının son 5 oyununda qələbəyə həsrət qalan “Simurq” sabah 29-cu tur çərçivəsində "Qəbələ"ni qonaq edəcək. Azerisport.az xəbər verir ki, saat 18:00-da start fiti veriləcək oyunda məlum qərarla cəzalandırılan baş məşqçi Georgi Çixradze yetirmələrinə tapşırıqlarını verə bilməyəcək. Rəqiblərin 18-ci duelində gürcü mütəxəssisi köməkçi məşqçi İqor Getman əvəzləyəcək.
Bu gün komanda son hazırlıqlarını da görərək, artıq istirahətə çəkilib. Hazırda Zaqatala təmsilçisinin "Qəbələ" ilə oyun öncəsi heyətində zədəli futbolçu yoxdu. Ancaq son oyunlarda əsas heyətdə özünə yer edə bilən gənc futbolçu Rəşad Eyyubov sarı vərəqə limitini keçdiyinə görə bu görüşdə meydana çıxa bilməyəcək. Turnir cədvəlində dördüncü pillədə qərarlaşan "Simurq" avrokuboklara getmək ümüdini itirməmək üçün, bu görüşdə mütləq qalib gəlməlidi. Həm də son oyunlardakı uğursuzluq sindromundan qurtulmaq üçün Zaqatala təmsilçisinə mütləq qələbə lazımdı.
Qeyd edək ki, komanda indiyənə qədər ümumilikdə "Qəbələ" ilə 17 dəfə üz-üzə gəlib. “Sarı-qaralar” cari mövsümdə bu komandaya məğlub olmasa da, doğma arenda keçirdiyi son 6 görüşdə rəqibini məğlub edə bilməyib. Hərəyə 6 dəfə meydanı qalib tərk edən rəqiblərin 5 görüşü heç-heçə ilə tamamlanıb. Ancaq top fərqində qonaqlar öndədirlər.
