2 may 2013 14:05
"Onlar yaxın gələcəkdə Azərbaycan futbolu naminə daha böyük nailiyyətlər qazanacaqlar”
“Neftçi”nin icraçı direktoru Mübariz Xudiyev klubun fəxri prezidenti Aqil Paşayevin xatirəsinə həsr olunmuş turnirlə bağlı fikirlərini açıqlayıb. Azerisport.az xəbər verir ki, o, klub saytına açıqlamasında bunları dilə gətirib:
“Bu gün “Neftçi” rəhbərliyi tərəfindən müəyyənləşdirilmiş inkişaf strategiyasının özülündə uşaq, yeniyetmə və gənc futbolçuların yetişdirilməsi dayanır. Klub prezidenti Sadıq Sadıqov əsas heyətlə yanaşı aşağı yaş qruplarında çıxış edən komandaların vəziyyəti ilə mütəmadi şəkildə maraqlanır. 1997-ci ildə “Neftçi”nin prezidenti olmuş Aqil Paşayevin xatirə turnirinin təşkil olunmasını bu mənada təqdirə layiq hal kimi qarşılayırıq. Turnirin əsasnaməsinə görə qələbə uğrunda 2001-2002-ci il təvəllüdlü futbolçulardan ibarət komandalar mübarizə aparıb. Nəticə etibarilə yarış uşaq futbolunun tərəqqisinə xidmət edir. Bu gün “Neftçi” məktəbi əsas heyət və milli komanda üçün Araz Abdullayev, Cavid İmamverdiyev, Mirhüseyn Seyidov, Tərlan Quliyev, Elvin Yunuszadə, Emin Mehtiyev və Emil Balayev kimi gənc futbolçular yetişdirib. Yaxın gələcəkdə bu siyahıya Elşən Abdullayev, Fəhmin Muradbəyli kimi futbolçular da qoşulacaq. Bununla yanaşı futbolçularımız müxtəlif yaş qrupları üzrə milli komandaların heyətinə cəlb olunur. Ümid edirik ki, onlar yaxın gələcəkdə Azərbaycan futbolu naminə daha böyük nailiyyətlər qazanacaqlar”.
