10 may 2013 17:27
Con Toşak: Xəzər Lənkəran Superkubok matçından imtina edə bilər
İyunun 27-də Bakıda Azərbaycan Superkuboku uğrunda oyun keçiriləcək. Azerisport.az xəbər verir ki, həlledici görüşdə ölkə çempionu ilə kubokun qalibi qarşılaşmalıdı.
Böyük ehtimalla həmin görüşdə “Neftçi” və “Xəzər Lənkəran” qarşılaşacaq. Özü də bu, kubokun finalında kimin qalib gəlməsindən asılı olmayacaq. Sözügedən klublar onsuz kubokun finalında da qarşılaşacaqlar. Bu üzdən “Neftçi”nin Premyer Liqanın qalibi olması yetərlidi ki, Superkubok oyununda da bu iki klub üz-üzə gəlsin.
Lakin sözügedən qarşılaşma komandalar üçün heç də münasib tarixdə keçirilməyəcək. Məsələ burasındadı ki, böyük ehtimalla ölkəmizi Avropa Liqasında təmsil edəcək “Xəzər Lənkəran” avrokuboklarda ilk oyununu iyulun 4-də keçirməlidi. Superkubok oyunu isə həmin tarixdən bir neçə gün öncəyə təsadüf edəcək. Adətən cənub təmsilçisi həmin tarixdə ölkə xaricində təlim-məşq toplanışında olur. Superkubok oyunu isə onların bu planlarını korlaya bilər.
“Ağ-yaşıllar”ın baş məşqçisi Con Toşak azerisport.az saytına müsahibəsində sözügedən məsələyə münasibətini açıqlayıb: “Bu, çox uğursuz və qeyri-münasib vaxtdı. Dünyanın heç bir ölkəsində bu tarixdə Superkubok matçı keçirilmir. Həmin günlərdə biz Avstriyada Avropa Liqasına hazırlaşacağıq. Sözügedən oyun isə bizim planlarımıza qarsıdı. Belə çıxır ki, həmin oyun ərəfəsində Bakıya gəlib, yenidən Avropaya qayıtmalıyıq. Özü də hələ hara yollanacağımız bilinmir. Çünki ilk oyunun evdə və ya səfərdə olacağını püşkatma müəyyənləşdirəcək”.
Toşakın sözlərinə görə, belə olan vəziyyətdə “Xəzər Lənkəran”ın Superkubok oyununda iştirakı mümkünsüz ola bilər: “Tamamilə mümkündü ki, biz bu oyundan imtina edək”.
Qeyd edək ki, “Xəzər Lənkəran”ın Avroliqadakı rəqibləri iyunun 24-də keçiriləcək püşkatmada bəlli olacaq.
