13 may 2013 00:45
Qəbələ erkən çempionluğa imkan verəcək?
Bu gün və sabah Topaz Premyer Liqasında 31-ci turun oyunları keçiriləcək. Azerisport.az xəbər verir ki, 2 gün davam edəcək turun ilk günündə 2, ertəsi gün 4 qarşılaşma baş tutacaq.
Görüşlərin eyni vaxtda başlayacağı tur mükafatların sahiblərinin adına aydınlıq gətirə bilər. Amma öncə ikinci altılıq komandaları münasibətlərinə aydınlıq gətirməlidi. “Turan” qərb derbisində “Kəpəz”lə qarşılaşacaq. Bu, 43-cü qərb derbisi olacaq. Son 3 qarşılaşmada qalib gələn “Turan” ümumi balansda da üstünlüyə malikdi. Tovuz təmsilçisi səfər oyunlarında 2:1 və 1:0, ev oyununda isə 5:1 hesabıyla üstün olmuşdu. Tovuzlular son 7 görüşdə meydanı qolsuz tərk etməyiblər.
Elitada qalmağa çalışan “Sumqayıt” isə “Xəzər Lənkəran”ı qəbul edəcək. 6-cı duelə üstünlüklə çıxacaq “Xəzər Lənkəran” cari mövsümdə rəqibini məğlub edə bilməyib. Lakin “Sumqayıt” hələ də bu rəqiblə görüşlərdə qələbə həsrətindədi. Cari mövsüm baş tutan görüşlərdə 1:1, 2:2 və 0:0 hesablı heç-heçələr qeydə alınıb. Bu dəfə necə olacağı maraqla gözlənilir.
İkinci altılığın daha bir görüşü isə növbəti oyun günündə keçiriləcək. “Rəvan” paytaxt derbisində AZAL-la qarşılaşacaq. Paytaxt derbisində üstünlük “Rəvan”ın tərəfindədi. Onlar AZAL-a qarşı keçirilən 7 oyunun hamısında ən azı 1 dəfə rəqib qapısına yol tapıblar. Cari mövsümdə keçirilən görüşlərdə isə AZAL öz meydanında 3:1 və 3:2 hesablı qələbələrə sevindiyi halda, “Rəvan” 1:0 hesabıyla üstün olub.
İlk altılıq çərçivəsində keçiriləcək görüşlərə gəlincə, çempionluq şansı qalan “Qarabağ” “Bakı”nı qəbul edəcək. Eyni sayda qələbə qazanan rəqiblərin əvvəlki 41 oyununda “Qarabağ” yalnız top fərqində üstünlük əldə edib. Rəqiblərin son 6 oyununda meydan sahibi olan tərəf qalib gəlməyib. Təsnifat mərhələsində bu komandalar qələbə qazana bilməmişdilər - 1:1 və 0:0. Final mərhələsindəki oyunda isə “Qarabağ” səfərdə minimal hesablı qələbəyə sevinmişdi.
“Simurq” “İnter”i qəbul edəcək. “İnter” 15 dəfə qarşılaşdığı “Simurq”la görüşlərdə aşkar üstünlüyə malikdir. Rəqiblərin son 7 oyununda qol vuran komanda qalib gəlir. Təsnifat mərhələsində hər iki klub ev oyunlarını 1:0 hesablı qələbəylə tamamlamışdı. “Bankirlər” Bakıdakı qarşılaşmada isə 5:0 hesablı darmadağına imza atmışdılar. Gümüş medalları qazanmaq yolunda paytaxt klubuna ancaq qələbə sərf edir. Amma Zaqatala təmsilçisi də dördüncü pillədəki yerini qorumaq üçün xal itirməməlidi.
Ən nəhayət, lider “Neftçi” səfərdə “Qəbələ”nin qonağı olacaq. 20-ci dueldə üz-üzə gələcək komandaların oyunlarında “Neftçi” üstünlüyə malikdi. “Qəbələ” isə son 3 ev görüşündə qalib gəlib. Rəqiblərin son 3 matçında da qonaqlar xala həsrətdi. “Neftçi” Bakıdakı oyunlarda 3:0 və 2:1 hesabıyla üstün olubsa, “Qəbələ” də 2:1 hesablı qələbəyə sevinib. Paytaxt klubu bu matçda hətta heç-heçə də etsə, çempionluğunu rəsmiləşdirəcək. Amma məğlub olacaqları halda, çempionluq mübarizəsi yenidən qızışa bilər. Təbii ki, “Qarabağ” da turu qalib başa vursa.
Topaz Premyer Liqası
31-ci tur
13 may (bazar ertəsi)
17:30. Turan – Kəpəz
Bakı. “Dalğa Arena”.
17:30. Sumqayıt – Xəzər Lənkəran
Bakı. “Bayıl Arena”.
14 may (çərşənbə axşamı)
17:30. Rəvan – AZAL
Bakı. “Bayil Arena”.
17:30. Qarabağ – Bakı
Bakı. T. Bəhramov adına Respublika stadionu.
17:30. Simurq – İnter
Zaqatala. Şəhər stadionu.
17:30. Qəbələ – Neftçi
Qəbələ. Şəhər stadionu.
| 1 | Neftçi | 30 | 19 | 4 | 7 | 58 | 30 | +28 | 61 |
| 2 | Qarabağ | 30 | 15 | 10 | 5 | 40 | 25 | +15 | 55 |
| 3 | İnter | 30 | 15 | 9 | 6 | 37 | 21 | +16 | 54 |
| 4 | Simurq | 30 | 11 | 11 | 8 | 31 | 26 | +5 | 44 |
| 5 | Bakı | 30 | 8 | 14 | 8 | 31 | 24 | +7 | 38 |
| 6 | Qəbələ | 30 | 10 | 7 | 13 | 31 | 38 | –7 | 37 |
| 1 | AZAL | 30 | 14 | 9 | 7 | 48 | 29 | +19 | 51 |
| 2 | XL | 30 | 10 | 10 | 10 | 39 | 34 | +5 | 40 |
| 3 | Rəvan | 30 | 11 | 4 | 15 | 41 | 48 | –7 | 37 |
| 4 | Sumqayıt | 30 | 8 | 8 | 14 | 29 | 47 | –18 | 32 |
| 5 | Turan | 30 | 7 | 6 | 17 | 29 | 53 | –24 | 27 |
| 6 | Kəpəz | 30 | 4 | 4 | 22 | 18 | 57 | –39 | 16 |
Bombardirlər:
26 - Nikolas Kanales (Neftçi)
19 - Franko Nildo (AZAL)
14 - Xuan Manuel Varea (Rəvan)
13 - Riçard Almeyda (Qarabağ)
10 - Salif Ballo (Turan)
9 - Pərdis Fərcad Azad (Sumqayıt)
8 - Yuri Fomenko (İnter), Baçana Sxadadze (İnter), Julius Vobay (Neftçi)
