13 may 2013 11:33
“Neftçi Qəbələdə çempion olacaq”
Azərbaycanlı futbol mütəxəssisi Asim Xudiyev Topaz Premyer Liqasının 31-ci turunun oyunları ilə bağlı proqnozlarını açıqlayıb. Azerisport.az sizi həmin proqnozlarla tanış edir.
Turan – Kəpəz
Hər ikisi region klubu olsa da, ev oyunlarını xeyli müddətdi Bakıda keçirirlər. Son turda fərqli nəticələr qazanıblar. “Kəpəz” qələbə qazandığı halda, “Turan” uduzmuşdu. Bu dəfə isə onların heç-heçə edəcəyini düşünürəm.
Sumqayıt – Xəzər Lənkəran
“Sumqayıt” son oyunlarında heç də pis təsir bağışlamır. Baxmayaraq ki, fərqli nəticələr göstərir. “Xəzər Lənkəran” da yeni baş məşqçisinin rəhbərliyi altında yaxşı oyun sərgiləməyə çalışır. Lakin onların hazırda kubokun finalını daha çox düşündüyü şübhəsizdi. Fikrimcə, bu oyunda da heç-heçə qeydə alınacaq.
Rəvan – AZAL
“Rəvan” son oyunlarını məğlubiyyətlə başa vurub. AZAL isə artıq xeyli müddətdi qələbələri sıralamaqla məşğuldu. “Təyyarəçilər”in bu oyunda da qələbə şansını qaçırması inandırıcı görünmür. AZAL qalib gələcək.
Qarabağ – Bakı
“Bakı”nın dördüncü yeri tutmaq şansı hələ də qalır. “Qarabağ” isə 3 xal qazanmaqla çempionluq şansının qalmasına çalışacaq. Ona görə də “Qarabağ”ın qalib gələcəyi qənaətindəyəm.
Simurq – İnter
Bu komandaların oyunlarında statistik üstünlük “İnter”in tərəfindədi. Son oyunda da bu komandanın 5:0 hesablı qələbəsi qeydə alınmışdı. Turnir cədvəlindəki vəziyyət “İnter”i qələbə qazanmağa sövq edir. Elə bu komandanın da qalib gələcəyini düşünürəm.
Qəbələ - Neftçi
“Neftçi”nin çempion olması üçün heç-heçə də yetərli olacaq. Amma bu görüşün necə başa çatacağını proqnozlaşdırmaq çox çətindi. “Qəbələ” son turda “Bakı”nı məğlub etməklə altılıqda ilk qələbəsini qazandı. Bu oyunda isə heç-heçə görəcəyik.
