16 may 2013 00:14
UEFA da Neftçinin çempion olmasından yazdı
UEFA-nın rəsmi saytı “Neftçi”nin dalbadal üçüncü, ümumilikdə səkkizinci dəfə Azərbaycan çempionu adını qazanması ilə bağlı yazı dərc edib. Azerisport.az xəbər verir ki, “Neftçi”nin diktaturası” adlı yazıda klubun rəhbərliyinin, məşqçi və futbolçuların fikirlərinə yer verilib.
Paytaxt klubunun vitse-prezidenti Tahir Süleymanov bu dəfə qazanılan çempionluğun daha əvvəl əldə etdikləri uğurlarla müqayisədə çətin olmasını vurğulayıb. O xatırladıb ki, 2011/12-ci il mövsümündə komanda çempionatın başa çatmasına üç, ötən il iki, bu dəfə isə bir tur qalmış birinciliyi təmin edib: “Biz mövsüm ərzində bir neçə dəfə çətinliklə üzləşdik. Amma buna baxmayaraq, sübut etdik ki, komandamız yenə də Azərbaycanda ən güclüdü”.
“Neftçi”nin kapitanı Rəşad Sadiqov qeyd edib ki, onlar bu uğuru qazanacaqlarına inanırmışlar və nəticədə də buna nail olublar. Müdafiəçi İqor Mitreski uğurda klubun prezidenti Sadıq Sadıqovun xüsusi rolunu qeyd edib: “O, bizi həmişə dəstəkləyib. Biz yaxşı təcrübə toplamışıq, Avroliqanın qrupundan oynamışıq. İnanıram ki, bu tempdə də davam edəcəyik”.
Hücumçu Nikolas Kanales isə deyib: “Çempion olmaqdan gözəl bir duyğu yoxdu. Bu gun uzun sürən marafondan sonra çempionluğu yaşadım. “Çempionluq yolunda mənə dəstək olan hər kəsə öz təşəkkürümü bildirirəm. Bu gün çox gözəl bir gündür”.
