17 may 2013 13:56
“Azərbaycanla oyun millidəki gələcək taleyimə aydınlıq gətirəcək”
Xəbər verdiyimiz kimi, futbol üzrə Azərbaycan yığmasının DÇ-2014-ün seçmə mərhələsindəki rəqibi Lüksemburq fransız futbolçu milliləşdirmək istəyirdi. Azerisport.az xəbər verir ki, bu, hazırda Belçikanın “Beerschot” klubunda çıxış edən Maksim Şanoydu.
23 yaşlı futbolçu nəhayət ki, dünən Lüksemburq vətəndaşlığını almağa nail olub. Bu, onun bir nənəsinin Lüksemburq əsilli olması nəticəsində baş tutub.
Qeyd edək ki, Nansidə anadan olmuş Şanonun ilk klubu da məhz yerli “Nancy” klubu olub. Lakin o, yetirməsi olduğu bu klubdan tez ayrılıb və müxtəlif dövrlərdə “Reims”, “Sheffield United” (İngiltərə), “Mansfield Town” (İngiltərə), “Hamilton” (Şotlandiya), “Le Mans”, “Gueugnon”, “Woluwe” kimi komandalarda çıxış edib.
Onu da bildirək ki, Lüksemburq yığması DÇ-2014-ün seçmə mərhələsi çərçivəsində iyunun 7-də Azərbaycan millisinin qonağı olacaq və Şano da həmin görüşdə forma geyməyə ümid edir. O, bu münasibətlə açıqlama da verib:
“Bilirəm ki, bizi Azərbaycanla səfər oyunu gözləyir. İlk oyunda onlarla sülh bağlamışıq. Qrupumuzda həmçinin Rusiya və Portuqaliya kimi komandalar da var. Azərbaycanla oyun mənim yığmadakı gələcək taleyimə aydınlıq gətirəcək”.
