22 may 2013 00:15
Azərbaycan çempionatına yekun vuruldu
Mayın 21-də “Sərhədçi” İdman Olimpiya Mərkəzində yeniyetmələr arasında sərbəst və yunan-Roma güləşi üzrə Azərbaycan çempionatına yekun vurulub. Azerisport.az xəbər verir ki, Beynəlxalq Güləş Federasiyasının (FİLA) mövcud qaydalarına əsasən təşkil olunan və şəxsi xarakter daşıyan çempionatda respublikanın bütün bölgələrini təmsil edən 1996-1997-ci illər təvəllüdlü idmançılar 10 çəki dərəcəsində mübarizə aparıblar.
Yarışın sonuncu günündə yunan-Roma güləşçiləri xalça üzərinə çıxıblar. Maraqlı idman mübarizəsi şəraitində keçən yarışda Namaz Rüstəmov (46 kq), Niyazi Məmmədov (54 kq), Sənan Əlimirzəyev (63 kq), İslam Abbasov (76 kq) və Adambek Şidukov (100 kq) fəxri kürsünün ən yüksək pilləsinə qalxıblar.
Yarışın əsas məqsədi ölkə ərazisində güləş idman növünün təbliği və inkişafına nail olmaq, respublikada fəaliyyət göstərən idman təşkilatlarında təlim-məşq prosesini təkmilləşdirmək və müvafiq yaş qrupu üzrə mükafata layiq yerlər tutmuş idmançıları yığma komandalara cəlb etməkdi.
Hər çəki dərəcəsində mükafata layiq yerlər tutmuş idmançılar medal və diplomla yanaşı, Azərbaycan Güləş Federasiyasının pul mükafatını da almış və yığma komandanın heyətinə cəlb olunublar.
