22 may 2013 17:11
“Bir səhv hər şeyin üstündən xətt çəkdi”
“Mövsüm çox ağır alındı. Müəyyən zaman turnir cədvəlində liderlik etdik, lakin fevralda komanda birinciliyi əldən verdi. Təəssüf ki, turnir cədvəlində birinci yer uğrunda əsas rəqiblərimizlə qış fasiləsindən sonra keçirdiyimiz oyunlarda lazım olan nəticəni əldə edə bilmədik. Bizim yaxşı futbolçularımız var, komandamıza yaxşı məşqçi rəhbərlik edir. Lakin buna baxmayaraq, bizi çempionluqdan məhrum edən səhvlərə yol verdik".
Azerisport.az xəbər verir ki, bu sözləri "İnter"in futbolçusu Bryus Abdulay klubun saytına başa çatmış mövsümü dəyərləndirərkən deyib.
Fransalı müdafiəçi Premyer Liqanın çempionu "Neftçi" və ikincisi olan "Qarabağ"la oynadıqları matçlar haqqında da danışıb: “İlk altılıq”da “Qarabağ” və “Neftçi” komandalarına qarşı səfər oyunlarında rəqibə heç nədə uduzmadıq, lakin bir səhv hər şeyin üstündən xətt çəkdi. Futbol belədir. Bizə buraxılan səhvlərdən nəticə çıxarmaq və həmin səhvləri növbəti mövsümdə təkrarlamamaq qalır. Amma üçüncü yer də pis nəticə deyil. Bizi qarşıda Avropa Liqasının oyunları gözləyir və komanda bu turnirdə gücünü göstərməlidi”.
