23 may 2013 11:15
Con Toşak: Onlar XL-da daha böyük istəklə oynayacaqlar
“Xəzər Lənkəran”ı hazırda klublarımız arasında transfer bazarının ən fəalı saymaq olar. Azerisport.az xəbər verir ki, cənub təmsilçisi cəmi bir neçə gün ərzində artıq üç önəmli transferi tam olaraq rəsmiləşdirib.
Bunlar AZAL-ın liderləri olmuş Franko Nildo ilə Zohair Benuahi, eləcə də “Simurq”dan gələn Rasim Ramaldanovdu.
Komandanın baş məşqçisi Con Toşak yeni transferlərlə bağlı fikirlərini açıqlayıb. Azerisport.az saytına müsahibəsində o, bunları söyləyib:
“Bu futbolçuların çıxış etdiyi mövqelərlə bağlı bizdə problemlər var idi. Onları transfer etməyimizin əsas səbəblərindən biri də ondan ibarətdi ki, artıq yerli çempionatı yaxşı tanıyırlar, bilirlər. Bu üzdən onlara uyğunlaşmaq üçün əlavə vaxta ehtiyac yoxdu. Əlbəttə, indi onlar daha iddialı komandada oynamaq şansı qazanacaqlar. Ümid edirəm ki, burda daha böyük istəklə çıxış edəcəklər. Bununla rəqiblərimizə qarşı heç bir hörmətsizliyə yol vermək fikrim yoxdu. AZAL-a hörmət edirəm. Nildo ilə Benuahini məhz bu komandanın oyunları zamanı iş başında görmüşəm. Onlar bacarıqlı futbolçulardı və komandamızı gücləndirəcəklər.
Əlbəttə, mən komandamıza daha yüksək səviyyəli futbolçular çağırmaq istərdim. Amma elə oyunçular Azərbaycanda oynamaq istəmirlər. İstisna deyil ki, komandada elə oyunçulardan da olsun. Etiraf edim ki, bir neçə elə oyunçu gözaltı etmişəm. Adlarını çəkmək istəmirəm. Lakin az deyillər.
Onların bura gəlmək istəməməsinin əsas səbəbi heç də maliyyə şərtləri ilə bağlı deyil. Klub rəhbərliyi bu baxımdan qarşıma sərhəd qoymayıb. Sadəcə Azərbaycan onları cəlb etmir. Yaxşı günləri artıq geridə qalmış belə oyunçular isə bizə istədiyimiz nəticələri qazanmağa kömək edə bilməz”.
