26 may 2013 01:35
Avropanın kralı - Bayern! (YENİLƏNİB)
UEFA Çempionlar Liqasının 2012/13-cü il mövsümünə yekun vurulub. Azerisport.az xəbər verir ki, qitənin ən nüfuzlu klub turnirinin finalında iki alman klubu – “Borussia” (Dortmund) və “Bayern” üz-üzə gəlib.
Münhen klubu son Almaniya çempionu olduğu halda, “Borussia” bundan əvvəl ardıcıl iki dəfə Bundesliqanın qalibi olmuşdu.
“Borussia” tarixində bir dəfə - 1997-ci ildə Çempionlar Liqasını qazanmışdı. “Bayern" isə bu uğura dörd dəfə imza atmışdı. Münhen təmsilçisi sonuncu dəfə 2001-ci ildə Avropanın ən güclüsü olmuşdu. Keçən mövsüm isə finalda İngiltərənin "Chelsea" klubu ilə dueldən məğlub ayrılmışdı.
Böyük maraqla gözlənilən oyun Londonun "Uembli" stadionunda keçirilib. Oyunu Nikola Ritsollinin başçılıq etdiyi italiyalı hakimlər briqadası idarə edirdi. Qarşılaşmada hesabı "Bayern" açsa da, "Borussia" tezliklə bu qola cavab verdi. Lakin son saniyələrdə münhenlilər daha bir qol vuraraq, tarixində beşinci dəfə ÇL-in kubokunu başı üzərinə qaldırıb.
Çempionlar Liqası
Final
25 may
Borussia (Dortmund) – Bayern – 1:2 (0:0)
Qollar: Mandzukiç, 60 (0:1), İ.Gündoğan, 68-pen (1:1), Robben, 89 (1:2)
BORUSSİA: Veydenfeller (k), Subotiç, Pişçek, Hummels, İlkay Gündoğan, Blaşikovski, Şmeltser, Bender, Qrosskroyts, Roys, Levandovski.
Ehtiyat oyunçular: Lanqerak, Kirx, Santana, Köl, Lyaytner, Nuri Şahin, Şiber.
BAYERN: Noyer, Boatenq, Martines, Dante, Lam (k), Riberi, Robben, Tomas Müller, Alaba, Şvaynştayger, Mandzukiç.
Ehtiyat oyunçular: Ştarke, Van Buyten, Şaqiri, Luis Qustavo, Timoşuk, Pisarro, Mario Qomes.
