28 may 2013 12:18
İnter son mövsümdə: ən az qol buraxan komanda!
“İnter”in rəsmi saytı komandanın 2012/13-cü il mövsümündəki statistik göstəricilərini açıqlayıb. Azerisport.az xəbər verir ki, yekuna həsr olunmuş birinci materialda keçirilmiş oyunlar, qazanılmış xallar, vurulmuş və buraxılmış qollar barədə statistik məlumatlar diqqətə çatdırılıb.
Beləliklə, “İnter” 2012/13-cü il mövsümündə 32 matç keçirdi və bu oyunlarda 57 xal topladı. Keçirilən matçlarda “İnter” 16 qələbə əldə etdi, 9 qarşılaşmanı sülhlə yekunlaşdırdı və 7 dəfə məğlub oldu. 32 oyunda “İnter” 38 dəfə rəqiblərin qapısına yol tapa bildi və qapısında cəmi 22 qol gördü.
Qeyd etməyə dəyər ki, mövsümdə qələbə sayına görə “İnter” yalnız çempionatı birinci yerdə başa vuran “Neftçi” komandasına uduzur. Komandanın əldə etdiyi qələbə qədər (16), yalnız “Qarabağ” və AZAL komandaları aktivlərinə yazmağı bacardı. Məğlubiyyət sayına görə (7) “İnter” yalnız cəmi 5 dəfə məğlub olan “Qarabağ”dan geri qalır.
16 ev oyununda “İnter” 10 dəfə qalib gəldi, 5 matç heç-heçə başa çatdı və yalnız bir dəfə rəqibinə yenildi. Yeganə ev məğlubiyyətini “İnter” 24-cü turda “Neftçi” komandasından aldı (0:1). Bu matçlarda Kaxaber Sxadadzenin yetirmələri 22 qol vurdular və 6 dəfə oyuna mərkəzdən başladılar. Səfər matçlarının statistikası belədir: 6 qələbə, 4 heç-heçə və 6 məğlubiyyət, toplar 16-16.
32 oyunda vurulan 38 qol (hər oyunda orta hesabla 1,18 qol)-bu, mövsümdə məhsuldarlığa görə 6-cı göstəcidi. Daha çox qola “Nefttçi”, AZAL, “Rəvan”, “Qarabağ” və “Xəzər Lənkəran” komandaları imza atdı. Buraxılmış qolların sayına görə “İnter” mövsümdə ən yaxşı göstəriciyə malikdi.
İnter”in ən uzun məğlubiyyətsizlik seriyası 10 oyun təşkil etdi. Həmin seriya 3-cü turda “Xəzər Lənkəran”a qarşı keçirdiyi oyun (0:0) zamanı başlamış və “Simurq”la (1:0) matçda başa çatmışdı. “İnter”in keçirdiyi oyunlarda ən populyar hesab 1:0-dı. Belə hesabla başa çatan oyunların sayı 8-ə bərabərdi və 4 oyun bu nəticəylə həm “İnter”in , həm də rəqiblərin xeyrinə yekunlaşmışdı.
Qeyd edək ki, çempionatın oyunlarında “İnter”ə 2 dəfə əzmkar qələbə qazanmaq müyəssər oldu. Belə ki, 4-cü tur “Turan”la oyunda 1:2 hesabıyla məğlub durumda olduğu halda, “İnter” yekunda 3 xal qazanmağı bacarmışdı - 3:2. Digər iradəli qələbə 11-ci tura təsadüf edir. “Kəpəz”lə oyunda 0:1 hesabıyla məğlub olduğu zaman komanda nəticədə 3:1 hesabıyla qalib gəlmişdi.
Hamıdan çox, 3 dəfə “İnter” 2 komandaya qalib gəlmişdi: “Qəbələ” və “Bakı”. Bununla yanaşı, “İnter”ə “Qarabağ”ı, “Neftçi”ni və AZAL-ı bir dəfə də məğlub edə bilmədi. AZAL bu komandanın çempionat ərzində qapısına yol tapa bilmədiyi yeganə komanda oldu.
