29 may 2013 18:24
Xəzər Lənkəran istirahətə yollandı, iki legioner komandadan uzaqlaşdırıldı
“Xəzər Lənkəran” daha iki futbolçusunun xidmətindən imtina edib. Azerisport.az saytına bu barədə klubun vitse-prezidenti Tuyqun Nadirov xəbər verib.
Con Toşakın bu dəfəki “qurbanları” da əcnəbilər olub. Belə ki, kubokun final oyunundan sonra uelsli mütəxəssis yunan Dimitrios Sialmas və türk Gökhan Güləçin xidmətindən imtina edib. Hər iki futbolçunun başa çatan müqaviləsinin müddəti uzadılmayıb.
Qeyd edək ki, yayda Yunanıstanın AEK klubundan transfer olunan Sialmas «Xəzər Lənkəran»da 21 oyuna çıxaraq 6 qol vurub. Türkiyənin “Şanlıurfaspor” klubundan gələn Gökhan isə Lənkəran təmsilçisində 11 oyun keçirərək 2 dəfə fərqlənib.
Maraq üçün xatırladaq ki, “Xəzər Lənkəran” bundan əvvəl Roberto Alviz və Lusiano Olguinlə də yolları ayırmışdı.
Sonda onu da əlavə edək ki, dünən baş tutan “Neftçi” ilə kubokun final matçından sonra Con Toşak komandaya istirahət verib. Əcnəbi futbolçular vətənlərinə yola düşüblər. Komanda iyunun 19-da Almaniyada bir araya gələcəklər. “Ağ-yaşıllar” Avropa Liqasının oyunlarına məhz bu ölkədə hazırlaşacaq.
