29 may 2013 23:07
13:0 hesablı darmadağına şərh
Bakıda təşkil olunan III Caspian Cup beynəlxalq turniri çərçivəsində keçirilmiş Bolqarıstan – Qazaxıstan matçından (13:0) sonra hər iki komandanın baş məşqçisi fikirlərini açıqlayıb. Azerisport.az xəbər verir ki, çalışdırıcılar bunları dilə gətiriblər:
Petar Pençev (Bolqarıstan U-17 komandasının baş məşqçisi): "Hesabın böyük olacağını gözləmirdik. Çünki rəqibi yaxından tanımırdıq. Oyunumuz alındı və bacardığımız qədər çox qol vurduq. Birinci hissədən sonra nisbətən sakitləşdik və ehtiyat oyunçulara şans verdik. Belədə onları da yoxlamağa imkan tapdıq".
Sergey Polenov (Qazaxıstan U-17 komandasının baş məşqçisi): "Bir aya yaxındır ki, komanda bir araya gəlib. Xətlərarası əlaqə istənilən səviyyədə deyildi. Üstəlik, futbolçularımız rəqiblə müqayisədə bir yaş kiçikdirlər. Bu gün bütün parametrlərdə - fiziki, taktiki, psixoloji - bolqarlara uduzduq. Nəticəyə görə futbolçuları danlamağı nəzərdə tutmuruq, sadəcə səhvlərini göstərib, nə etməli olduqlarını başa salacağıq".
