Saşa Stamenkoviç: Rəqib futbolçuları qəsdən təxribata çəkirdim, amma onlarla problemim yoxdu

“Neftçi”nin qapıçısı Saşa Stamenkoviçin azerisport.az saytına müsahibəsi

 

- “Xəzər Lənkəran”la Azərbaycan Kubokunun final oyunu barədə nə deyə bilərsiz?
- Çox yaxşı və keyfiyyətli oyun alındı. Deməzdim ki, baxımlı oyun oldu. Amma gərginlik kifayət qədər idi. Meydanda əsl mübarizə getdi. Stadiona gələn bütün azarkeşlərə təşəkkürümü bildirmək istəyirəm. Klub rəhbərliyinə, məşqçilər korpusuna da mənə güvəndikləri üçün təşəkkürümü bildirirəm.

 

- Dimitrios Sialmasın penalti zərbəsini dəf etməklə “Neftçi”yə kubok qazandırdınız. Buna xüsusi hazırlaşmışdınız?
- Bu, bizim kiçik sirrimizdi (gülür). Biz məşqlərdə belə zərbələri çox qaytarırıq.

 

- Mən hələ Belqradda gənc futbolçu olanda çoxlu turnirlərdə iştirak edirdim. Məni hələ o vaxt məşqçilərimiz penaltilər üzrə mütəxəssis sayırdı.

 

- Penalti seriyası zamanı rəqib futbolçuları qəsdən təxribata çəkirdiniz?
- Bəli. Qəsdən edirdim. Amma bunu yalnız rəqibi özündən çıxarmaq üçün edirdim. Mənim “Xəzər Lənkəran”ın futbolçuları ilə başqa heç bir problemim yoxdu.

 

- Oyundan sonra rəqib komandanın baş məşqçisi Con Toşak sizə yaxınlaşıb nəsə dedi və elə bunun ardınca da meydanda aləm bir-birinə dəydi. Orda nə baş verdi ki?
- O, mənə yaxınlaşıb bildirdi ki, penalti zərbələri zamanı etdiklərim təxribat xarakterli idi. Ardından bir-birimizin əlini sıxıb, sağollaşdıq. Ondan sonra olanları isə şərh etmək istəmirəm. Qoy öz aralarında ayırd etsinlər.

 

- Qarşıda “Neftçi”ni Çempionlar Liqası gözləyir. Hansı komandanı rəqibiniz görmək istəyirsiz?
- Mən düzünü deyim ki, hələ hansı variantların olduğunu bilmirəm. Sadəcə onu bilirəm ki, səpələnmişlər səbətində yer alacağıq.