30 may 2013 22:33
“Bu komandanın oyununa yaxşı bələdəm”
Bakıda təşkil olunan III Caspian Cup beynəlxalq turniri çərçivəsində keçirilmiş Tacikistan – Yaponiya matçından (1:3) sonra hər iki komandanın baş məşqçisi fikirlərini açıqlayıb. Azerisport.az xəbər verir ki, çalışdırıcılar bunları dilə gətiriblər:
Suzuki Çikaşi (Tacikistan yığmasının baş məşqçisi): "Yapon olduğum üçün Yaponiya yığmasının oyununa yaxşı bələdəm. Rəqib komanda qısa ötürmələrlə sürətli hücum quraraq ilk hissədə qapımızdan iki top keçirdi. Lakin fasilədən sonra toparlanaraq rəqibi sıxışdırmağa başladıq. Nəticədə qol vurduq".
Yoşitake Hirofumi (Yaponiya yığmasının baş məşqçisi): "İlk növbədə əla təşkilatçılığa görə sizə təşəkkür edirəm. Oyuna gəlincə, vacib olan qələbəni qazandıq. Lakin qol şanslarımızın hamısından lazımınca yararlana bilmədik. Ümidvaram, komandamız növbəti oyunlarda bu çatışmazlığı aradan qaldıracaq".
