1 iyun 2013 00:25
FIFA irqçiliyə görə cəzanı sərtləşdirdi
FİFA futbol agentlərinin fəaliyyətini tənzimləyən qaydalar toplusuna düzəlişləri bəyənib. Azerisport.az xəbər verir ki, dünya futbol qurumu habelə komandaları azarkeşlərinin irqçilik hərəkətlərinə görə daha ciddi cəzalandırmaq niyyətindədi. Bu barədə təşkilatın rəsmi saytında xəbər verilir.
FİFA-nın Mübahisələrin həlli palatasının sədri və FİFA-nın Oyunçuların statusu komitəsinin üzvü Ceff Tompson Port-Luidə (Mavrikiya) keçirilən konqresdə yeni müddəalar təqdim edib. Cəmi üç dəyişiklik təklif olunub: mövcud lisenziyalaşdırma sistemindən imtina edilməsi, qaydalara daxil ediləcək minimum standartların və tələblərin tətbiq olunması, habelə agentlərin qeydiyyatı sisteminin yaradılması.
Layihə FİFA-nın İcraiyyə Komitəsi və Konqresi tərəfindən bəyənildikdən sonra məsələ xüsusi işçi qrupuna veriləcək. Bu qrup 2014-cü ildə yenilənmiş qaydalar təqdim etməlidi.
Beynəlxalq Futbol Federasiyasının prezidenti Yozef Blatter deyib ki, klublar öz azarkeşlərinin irqçilik hərəkətlərinə görə daha sərt cəzalandırılacaqlar. Blatter Port-Luidə keçirilmiş konqresdə bunları dilə gətirib: “Cərimə yetərli cəza deyil. Ola bilsin ki, komandalar boş tribunalar şəraitində oyunlar keçirməklə cəzalandırılsınlar. Lakin ən yaxşı qərar xalların götürülməsi və hətta oyunçuların yarışlardan çıxarılması olacaq. Belə ki, öz fanatlarına görə məhz klub məsuliyyət daşıyır. FİFA irqçilik təzahürlərinə qarşı amansız mübarizə aparmaq niyyətindədi. Biz klublara qarşı hansı sanksiyaların tətbiq olunacağına dair milli federasiyalara və konfederasiyalara dəqiq təlimatlar verəcəyik”.
