2 iyun 2013 20:08
Cabbarovdan Azərbaycan - ABŞ matçında absurd qərarlar
AFFA-nın təşkilatçılığı ilə keçirilən ənənəvi III Caspian Cup beynəlxalq turniri davam edir. Lakin azerisport.az xəbər verir ki, sözügedən turnirə kölgə salan bəzi məqamlar da diqqətdən yayınmır.
Məsələ burasındadı ki, ötən gün qrup mərhələsinin son oyunu çərçivəsində keçirilən Azərbaycan – ABŞ görüşündə kifayət qədər kobud hakim səhvləri qeydə alındı. Öncədən qeyd edək ki, bu görüşü Rauf Cabbarov idarə edirdi.
U-17-lərin görüşlərində bir hissə 40 dəqiqədən ibarətdi. Lakin maraqlıdı ki, bu görüş zamanı tabloda 39-cu dəqiqə göstərərkən Cabbarov birinci hissəni başa vurdu. Bu, təbii ki, məğlub durumda olan yığmamızın üzvlərinin kəskin narazılığına səbəb oldu və onlar hakimin səhvə yol verdiyini ona başa salmağa çalışdılar. Məhz oyunçuların bu təzyiqindən sonra Rauf Cabbarov yenidən oyunu davam etdirdi (!).
İkinci hissədə hakim daha bir səhvə yol verdi. Qarşılaşmanın 64-cü dəqiqəsində yığmamızın üzvü Roman Hüseynova ikinci sarı vərəqə göstərildi. Lakin baş hakim bunu bir neçə saniyədən - bloknotuna baxdıqdan sonra başa düşdü və futbolçumuzu çağırıb qırmızı vərəqəni göstərdi.
Cabbarovun ən böyük səhvi isə yığmamızın lehinə iki penaltini verməməsi oldu. Halbuki, onlardan ən azı birini vermək olardı. Yaxud da oyunçunun simulyasiyaya yol verdiyini düşünüb penalti təyin etmirsənsə, ən azından həmin futbolçuya sarı vərəqə göstərmək lazım olduğu da Cabbarovun yadına düşmədi.
