3 iyun 2013 00:12
Baku United İngiltərədə ən güclü oldu
Böyük Britaniyada fəaliyyət göstərən "Odlar Yurdu" təşkilatının təsis etdiyi "Baku United" futzal klubu İngiltərə çempionu adını qazanıb. Azerisport.az xəbər verir ki, iyunun 1-də Londonun mərkəzi futzal arenasında İngiltərə Milli Futzal Liqasının "Dördlər finalı"nda rəqiblərinə qalib gələn "Baku United" İngiltərənin ən güclü futzal klubu olub.
"Dördlər finalı"nda "Baku United"dən başqa "Helvecia", "London United" və "Şeffild FK" klubları iştirak ediblər.
Püşkatmanın nəticəsinə görə, yarımfinalda "Şeffild"lə qarşılaşan "Baku United"in qələbəsi çətin başa gəlib. Hesabı birinci hissədə "Şeffild" açıb. Böyük üstünlüyünə baxmayaraq, "Baku United" hesabı yalnız 2-ci hissənin ortalarında bərabərləşdirə bilib. Oyunun son dəqiqələrində təzyiqi artıran komanda 2-ci hissənin sonuna bir saniyə qalmış qələbə topunu vurub. Bu qələbə "Baku United"i finala çıxarıb.
Final oyununda isə "Baku United" son 5 sezonun qalibi olan və braziliyalı legionerlərdən ibarət "Helvecia" klubu ilə qarşılaşıb. Oyun olduqca mürəkkəb və ağır mübarizə şəraitində keçib. Əsas vaxt 0:0 hesabı ilə bitsə də, əlavə vaxtda “Helvecia” hesabı açmağa müvəffəq olub. Bununla belə, böyük azarkeş dəstəyinə malik olan “bakılı” komanda 2-ci ekstra-taymın son dəqiqələrində bərabərlik qolunu vurub. Penallaşma seriyasında isə "Baku United" inamlı şəkildə 5-3 hesabı ilə qalib gəlmiş və İngiltərə çempionu adını qazanıb.
Beləlliklə, növbəti mövsümdə İngiltərəni UEFA kubokunda "Baku United" klubu təmsil edəcək.
