3 iyun 2013 18:24
“Mənsimov finalda qalib gələcəyimiz halda vəd etdiyindən də artıq mükafat verdi”
“Xəzər Lənkəran”ın müdafiəçisi Adrian Skarlatake Rumıniya mətbuatına maraqlı açıqlama verib. Azerisport.az xəbər verir ki, o, “Neftçi” ilə Azərbaycan Kubokunun finala matçından (0:0, penaltilərlə 3:5) sonra uduzmalarına rəğmən klubun fəxri prezidenti Mübariz Mənsimov tərəfindən mükafatlandırılmalarının şokundan ayılmadıqlarını bəyan edib:
“Bu oyunun ilk hissəsində çox yaxşı təsir bağışladıq. Amma görüşün taleyini penaltilər həll etdi. Məğlub olduğumuz görüşdən sonra isə karyeramda heç vaxt üzləşmədiyim hadisə baş verdi. Klub prezidenti (o, yanlışlıqla Mübariz Mənsimovu klub prezidenti kimi təqdim edib – azerisport.az) oyundan sonra komanda ilə görüşdə və bildirdi ki, bizimlə fəxr edir. Finaldan məğlub ayrılsaq da, o, bizə qarşı qətiyyən hirsli deyildi. Bizim sərgilədiyimiz oyun onun çox xoşuna gəlmişdi. Oyundan öncə qələbə qazanacağımız halda bizə mükafat vəd olunmuşdu. Lakin biz uduzsaq da belə, qələbəyə görə vəd olunandan da artıq mükafat aldıq. Hətta paltardəyişmə otağından çıxanda artıq mükafatlar hər futbolçunun əlində idi”.
Skarlatake Azərbaycan Premyer Liqasından danışıb, onu Rumıniya çempionatı ilə müqayisə edib: “Rumıniya çempionatının səviyyəsi daha yüksəkdi. Amma Azərbaycan Premyer Liqasına azacıq nəsə lazımdı ki, Rumıniyaya çatsın. İnanıram ki, yaxın 2-3 ildə onlar buna da nail olacaqlar. Azərbaycanda futbola çoxlu sərmayə qoyulur. Zamanla bu ölkə Avroliqanın qrup mərhələsində iki klubla təmsil oluna biləcək”.
